सर्वसाधारणका लागि धौलागिरी लघुवित्त वित्तीय संस्था र अभियान लघुवित्त वित्तीय संस्थाले आइपिओ निष्कासन गर्ने भएका छन्। अभियान लघुवित्तले साउन १८ गतेदेखि र धौलागिरी लघुवित्तले साउन २४ गतेदेखि आइपिओ निष्कासन गर्न लागेका हुन्।
धौलागिरी लघुवित्तले जारी पुँजी दश करोड ३१ लाख रुपैयाँ बराबरको ३२.१० प्रतिशतले हुन आउने प्रतिशेयर १०० रुपैयाँ अंकित मूल्यका ३ करोड ३१ लाख रुपैयाँ बराबरको ३ लाख ३१ हजार कित्ता आइपिओ निष्कासन गर्न लागेको हो।
निष्कासन गरिने कुल ३ लाख ३१ हजार कित्ता शेयरमध्ये ०.५ प्रतिशत अर्थात् ५ हजार १५५ कित्ता कर्मचारीहरुका लागि र ५ प्रतिशत अर्थात १६ हजार ५५० कित्ता सामूहिक लगानी कोषहरुलाई सुरक्षित गरेको छ भने बाँकी रहेको तीन लाख ९ हजार २९५ कित्ता शेयरका लागि सर्वसाधारणका लागि बिक्री खुला गर्न लागेको कम्पनीले जानकारी दिएको छ।
त्यस्तै, अभियान लघुवित्तले प्रतिशेयर १०० रुपैयाँ अंकित मूल्यका ९ करोड ७५ लाख रुपैयाँ बराबरको ९ लाख ७५ हजार कित्ता आइपिओ निष्कासन गर्न लागेको हो।
कम्पनीले निष्कासन गर्न लागेको कुल ९ लाख ७५ हजार कित्ता शेयरमध्ये ०.५ प्रतिशत अर्थात् १२ हजार ५०० कित्ता कर्मचारीहरुका लागि र ५ प्रतिशत अर्थात् ४८ हजार ७५० कित्ता सामूहिक लगानी कोषहरुलाई सुरक्षित गरेको छ भने बाँकी रहेको ९ लाख १३ हजार ७५० कित्ता शेयरका लागि सर्वसाधारणले आवेदन दिन सक्ने कम्पनीले जानकारी दिएको छ।
धौलागिरी लघुवित्तको आइपिओमा साउन २९ गतेसम्म आवेदन दिन सकिन्छ । उक्त अवधिमा माग बमोजिम आवेदन नपरेमा भदौ ७ गतेसम्म समय लम्बिनेछ। लगानीकर्ताले न्यूनतम १० कित्तादेखि १० हजार कित्तासम्म आवेदन दिन सक्नेछन्।
अभियान लघुवित्तको आइपिओमा भने साउन २२ गतेसम्म आवेदन दिन सकिने छ । उक्त अवधिमा माग बमोजिम आवेदन नपरेमा भदौ १ गतेसम्म समय थप हुने जनाइएको छ। आवेदकले न्यूनतम १० कित्तादेखि ३ हजार कित्तासम्म आवेदन दिन सक्नेछन्।
धौलागिरी लघुवित्तको आइपिओ निष्कासन तथा विक्री प्रबन्धकमा सनराइज क्यापिटल लिमिटेड रहेको छ भने अभियान लघुवित्तको विक्री प्रबन्धकमा मुक्तिनाथ क्यापिटल लिमिटेड रहेको छ। आवेदकले सि-आस्वा सदस्य बैंक तथा वित्तीय संस्था र मेरो शेयर वेबसाइट तथा एपमार्फत आवेदन दिन सक्नेछन्।
अभियान लघुवित्तको आइपिओलाई इक्रा नेपालले 'इक्रा एनपी आइआर डबल बी माइनस' रेटिङ प्रदान गरेको छ। जसले कम्पनीको वित्तीय दायित्व बहन गर्ने क्षमतामा मध्यम जोखिम रहेको बुझाउँछ।
त्यस्तै, धौलागिरी लघुवित्तको आइपिओलाई आईपीओलाई केयर रेटिङ नेपालले 'केयर एनपी डबल बी माइनस आइएस' प्रदान गरेको छ। यसले कम्पनीको दायित्व वहन गर्ने क्षमतामा औसत जोखिम रहेको जनाउँछ।
