राप्ती हाइड्रो एण्ड जनरल कन्स्ट्रक्सन लिमिटेडको आइपिओ बाँडफाँट भएको छ। बिक्री प्रबन्धक सिद्धार्थ क्यापिटल लिमिटेडले आइपिओ बाँडफाँट गरेको हो।
कम्पनीले गत असार २९ गतेदेखि साउन १ गतेसम्म सर्वसाधारणका लागि कुल २३ लाख ६६ हजार २४० कित्ता साधारण सेयर आइपिओ निष्काशन गरेको थियो।
निष्काशन गरिएको कुल सेयरमध्ये ३ प्रतिशत अर्थात ७० हजार ९८८ कित्ता कर्मचारीहरूका लागि र ५ प्रतिशत अर्थात १ लाख १८ हजार ३१२ कित्ता सामूहिक लगानी कोषको लागि सुरक्षित गरिएको थियो।
कम्पनीका अनुसार आइपिओमा १४ लाख ९० हजार २९८ जना आवेदकले एक करोड ६२ लाख ५९ हजार २४० कित्ता सेयरका लागि आवेदन दिएका थिए। यो भनेको ७.४६ गुणाले मागभन्दा बढी आवदेन परेको हो।
आवेदन दिएकामध्ये एक हजार ४२४ जनाले १७ हजार ३७० कित्ता सेयरको लागि दिएको आवेदन रद्द भएको क्यापिटलले जनाएको छ। आवेदन दिएकामध्ये १२ लाख ७२ हजार ६०४ जनाको भने हात खाली रह्यो।
राप्ती हाइड्रो एण्ड जनरल कन्स्ट्रक्सनको आइपिओ नतिजा सिडिएससी आइपिओ रिजल्ट, सिद्धार्थ क्यापिटल र मेरो सेयरबाट हेर्न सकिन्छ।
आइपिओ निष्काशनका लागि गराएको रेटिङमा इक्रा नेपाले कम्पनीलाई इक्राएनपी आइआर बी रेटिङ प्रदान गरेको छ। यसले दायित्व बहन गर्ने क्षमतामा उच्च जोखिम रहेको संकेत गर्छ।।
