लगातार दुई दिन बढेको बजार सेयर बजार मंगलबार भने घटेको छ। मंगलबार नेप्से परिसूचक ४४.८० अंकले घटेको हो। यस दिन नेप्से परिसूचक २.१० प्रतिशतले घटेर २०८८.१६ बिन्दुमा पुगेर बन्द भएको हो।
आज कारोबारमा आएका २२२ वटा धितोपत्र तथा ऋणपत्रको ८७ लाख ४० हजार ५५१ कित्ता सेयरको ३ अर्ब ७० करोड ४९ लाख ९८ हजार ३९८ रुपैयाँ बराबरको सेयर खरिद-बिक्री भएको छ।
मौद्रिक नीतिपछि ११५ अंकले बढेको सेयर बजारमा मंगलबार नाफा बुक गर्ने लगानीकर्ता हाबी भएसँगै बजार घटेको देखिन्छ।
सोमबारको तुलनामा आज कारोबार रकम पनि घटेको छ। सोमबार ४ अर्ब १० करोड ६८ लाख १८ हजार ९४१ रुपैयाँ बराबरको सेयर खरिद-बिक्री भएको थियो।
मंगलबार मल्टिपर्पस फाइनान्सको सेयर मूल्य सर्वाधिक ९.३२ प्रतिशतले बढेर अन्तिम मूल्य ३३२ रुपैयाँ कायम भएको छ। त्यस्तै, सूर्योदय वोमी लघुवित्तको सेयर मूल्य ६.७२ प्रतिशतले बढेर ९४५ रुपैयाँमा कारोबार भएको छ।
मंगलबार मूल्य सर्वाधिक घट्नेमा गणपति लघुवित्त रहेको छ। कम्पनीको सेयर मूल्य अघिल्लो दिनको तुलनामा ६.८२ प्रतिशतले घटेर १ हजार २५ रुपैयाँ कायम भएको छ। त्यस्तै, रिभर फल्स पावरको मूल्य ५.९९ प्रतिशतले घटेर २२३ रुपैयाँमा कारोबार भएको छ।
यस दिन सर्वाधिक सेयर खरिद–बिक्री शिवम् सिमेन्टको भएको छ। कम्पनीको १९ करोड ३६ लाख रुपैयाँ बराबरको सेयर खरिद–बिक्री भएको हो। कम्पनीको सेयर मूल्य प्रतिकित्ता ८११ रुपैयाँ कायम भएको छ। यो मूल्य अघिल्लो दिनको तुलनामा ३.२२ प्रतिशतले घटेको हो।
सर्वाधिक सेयर खरिद–बिक्री हुने दोस्रो कम्पनीमा अरुण कावेली पावर रहेको छ। यस दिन उक्त कम्पनीको प्रतिकित्ता मूल्य ४९४ रुपैयाँमा १५ करोड ५७ लाख रुपैयाँ बराबरको सेयर खरिद–बिक्री भएको छ।
त्यस्तै, आज कारोबारमा आएका १३ वटा समूहगत परिसूचकमध्ये सबै समूहको परिसूचक घट्दा समग्र नेप्से घटेको हो।
मंगलबार अन्य समूहको परिसूचक सर्वाधिक ३.५६ प्रतिशतले घटेको छ। त्यस्तै, व्यापार, होटल्स तथा पर्यटन, विकास बैंक, वित्त, लघुवित्त र लगानी समूहको परिसूचक २ प्रतिशतभन्दा बढीले घटेको छ।
