गत आर्थिक वर्ष २०७८/०७९ को चौथो त्रैमासिकको वित्तीय विवरण सार्वजनिक गरेको नौ वाणिज्य बैंकले करिब ४० अर्ब रूपैयाँको ऋण असुली गर्न सकेको छैन ।
नेपाल क्रेडिट एण्ड कमर्श बैंक, प्रभु बैंक, सिटिजन्स बैंक, सनराइज बैंक, लक्ष्मी बैंक, माछापुच्छ्रे बैंक, सानिमा बैंक, ग्लोबल आइएमई बैंक, एनआइसी एशिया बैंकले गत आर्थिक वर्षको चौथो त्रैमाशिक वित्तीय विवरण सार्वजनिक गरेका हुन्।
यसरी कर्जा असुली हुन नसकेमा त्यस्तो कर्जाको ब्याजको ६३ प्रतिशत बराबरको रकम बैंकहरूले नियामक प्रणालीमा राख्नुपर्ने हुन्छ।
यी नौ बैंकहरूले दुई अर्ब ९५ करोड रूपैयाँ बराबर रकम नियामकिय व्यवस्थामा राखेका छन्। यस आधारमा बैंकहरूले करिब चार अर्ब ६८ करोड रूपैयाँ ब्याज उठाउन नसकेका हुन्।
राष्ट्र बैंकले सार्वजनिक गरेको जेठसम्मको तथ्यांकअनुसार कर्जाको ब्याजदर औसतमा ११.६५ प्रतिशत छ। ११.६५ प्रतिशत ब्याजदरको आधारमा गणना गर्ने हो भने बैंकहरूले करिब ४० अर्ब ५५ करोड रूपैयाँ बराबर ब्याज उठाउन नसकेका हुन्।
यी नौ बैंकले १४ खर्ब २३ अर्ब रूपैयाँ कर्जा लगानी गरेका छन्। बैंकहरूको खराब कर्जामा समेत वृद्धि भएको छ। कुल कर्जामा खराब कर्जाको अंश औसत १.०९ प्रतिशत रहेकोमा बढेर १.१३ प्रतिशत पुगेको हो।
