बुधबार नेप्से परिसूचक २३.८३ अंकले बढेको छ। यस दिन नेप्से परिसूचक १.१४ प्रतिशतले बढेर २१११.९९ बिन्दुमा पुगेर बन्द भएको छ।
बुधबार कारोबारमा आएका २२७ वटा धितोपत्र तथा ऋणपत्रको ७५ लाख ८ हजार १८८ कित्ता शेयरको ३ अर्ब १६ करोड १४ लाख ५५ हजार १४२ रुपैयाँ बराबरको सेयर खरिद–बिक्री भएको छ।
मौद्रिक नीतिपछि दुई दिन ११५ अंकले बढेको सेयर बजार मंगलबार नाफा बुक गर्ने लगानीकर्ता हाबी भएसँगै घटेको थियो। आज फेरि नेप्सेले वृद्धिको बाटो समातेको छ।
मंगबारको तुलनामा आज कारोबार रकम भने घटेको छ। मंगलबार ३ अर्ब ७० करोड ४९ लाख ९८ हजार ३९८ रुपैयाँ बराबरको सेयर खरिद–बिक्री भएको थियो।
बुधबार जानकी फाइनान्स र युनाइटेड मोदी हाइड्रोपावरको सेयर मूल्य सर्वाधिक १० प्रतिशतले बढेको छ। जानकी फाइनान्सको अन्तिम मूल्य ४६७ र युनाइटेड मोदी हाइड्रोपावरको मूल्य ३०५ रुपैयाँ कायम भएको छ। त्यस्तै, नेष्डो समृद्ध लघुवित्तको सेयर मूल्य ९.९७ र जाल्पा सामुदायिक लघुवित्तको सेयर मूल्य ९.८४ प्रतिशतले बढेको छ।
बुधबार मूल्य सर्वाधिक घट्नेमा कुमारी धनवृद्धि योजना रहेको छ। उक्त योजनाको इकाई मूल्य अघिल्लो दिनको तुलनामा १० प्रतिशतले घटेर अन्तिम मूल्य नौ रुपैयाँ कायम भएको छ। त्यस्तै, सानिमा बैंकको ऋणपत्रको मूल्य ५.१९ प्रतिशतले घटेर ८२० रुपैयाँमा कारोबार भएको छ।
यस दिन सर्वाधिक शेयर खरिद–बिक्री शिवम् सिमेन्टको भएको छ। कम्पनीको १७ करोड ९४ लाख रुपैयाँ बराबरको सेयर खरिद–बिक्री भएको हो। सो कम्पनीको सेयर मूल्य प्रतिकित्ता ८१६ रुपैयाँ कायम भएको छ। यो मूल्य अघिल्लो दिनको तुलनामा ०.६२ प्रतिशतले बढेको हो।
सर्वाधिक सेयर खरिद–बिक्री हुने दोस्रो कम्पनीमा अरुण कावेली पावर छ। यस दिन उक्त कम्पनीको प्रतिकित्ता मूल्य ५११ रुपैयाँमा १२ करोड ३५ लाख रुपैयाँ बराबरको सेयर खरिद–बिक्री भएको छ।
त्यस्तै, आज कारोबारमा आएका १३ वटा समूहगत परिसूचकमध्ये व्यापार समूहको ०.५८ प्रतिशतले घटेको छ भने बाँकी सबै समूहको परिसूचक बढ्दा समग्र नेप्से बढेको हो।
बुधबार अन्य समूहको परिसूचक सर्वाधिक ४.१३ प्रतिशतले बढेको छ। त्यस्तै, जलविद्युत, अन्य र लघुवित्त समूहको परिसूचक २ प्रतिशतभन्दा बढीले बढेको छ।
