साताको पहिलो कारोबार दिन आइतबार नेप्से परिसूचक ५४.५८ अंकले बढेको छ। यस दिन नेप्से परिसूचक २.५५ प्रतिशतले बढेर २१९५.१० बिन्दुमा पुगेर बन्द भएको छ।
आइतबार कारोबारमा आएका २२० वटा धितोपत्र तथा ऋणपत्रको एक करोड १३ लाख ३९ हजार ४७६ कित्ता सेयरको ४ अर्ब ६० करोड ९७ लाख ९१ हजार २७२ रुपैयाँ बराबरको सेयर खरिद–बिक्री भएको छ।
आइतबार बीमा कम्पनीका लगानीकर्ताले सर्वाधिक कमाएका छन्। यस दिन नेपाल इन्स्योरेन्स, नेको इन्स्योरेन्स, आइमएई जनरल इन्स्योरेन्स, प्रुडेन्सियल इन्स्योरेन्स र एनएलजी इन्स्योरेन्सको सेयर मूल्य १० प्रतिशतका दरले बढेको छ।
यस दिन सेयर मूल्य सर्वाधिक घट्नेमा गुडबिल फाइनान्स ऋणपत्र र नेशनल हाइड्रोपावर रहेको छ। गुडबिल फाइनान्सको ऋणपत्रको मूल्य ३.९४ र नेशनल हाइड्रोपावरको सेयर मूल्य ३.३० प्रतिशतले घटेर अन्तिम मूल्य क्रमशः एक हजार ७४ र २७५ कायम भएको छ।
आइतबार सर्वाधिक सेयर खरिद–बिक्री शिवम् सिमेन्टको भएको छ। कम्पनीको २१ करोड ३४ लाख रुपैयाँ बराबरको सेयर खरिद–बिक्री भएको हो। सो कम्पनीको सेयर मूल्य प्रतिकित्ता ८१८ रुपैयाँ कायम भएको छ। यो मूल्य अघिल्लो दिनको तुलनामा २.५१ प्रतिशतले बढेको हो।
सर्वाधिक सेयर खरिद–बिक्री हुने दोस्रो कम्पनीमा नेपाल दूरसञ्चार कम्पनी रहेको छ। यस दिन उक्त कम्पनीको प्रतिकित्ता मूल्य ९८० रुपैयाँमा १५ करोड २३ लाख रुपैयाँ बराबरको सेयर खरिद–बिक्री भएको छ।
त्यस्तै, आज कारोबारमा आएका १३ वटा समूहगत परिसूचकमध्ये वित्त समूहको परिसूचक १.६ प्रतिशतले घटेको छ भने बाँकी १२ समूहको परिसूचक बढ्दा समग्र नेप्से बढेको हो।
यस दिन लगानी, निर्जीवन बीमा र जीवन बीमा समूहको परिसूचक सर्वाधिक क्रमशः ४.७६, ४.५१ र ४.१६ प्रतिशतले बढेको छ।
त्यस्तै, व्यापार र अन्य समूहको परिसूचक ३ प्रतिशतभन्दा बढीले बढेको छ।
