केही दिनदेखि निरन्तर बढ्ने क्रममा रहेको नेप्से परिसूचक मंगलबार भने १.१५ अंकले घटेको छ। यस दिन नेप्से परिसूचक ०.१३ प्रतिशतले घटेर २१९३.४३ बिन्दुमा पुगेर बन्द भएको छ।
मंगलबार कारोबारमा आएका २१७ वटा धितोपत्र तथा ऋणपत्रको ३ अर्ब २९ करोड ३२ लाख ३४ हजार ७०६ रुपैयाँ बराबरको सेयर खरिद–बिक्री भएको छ।
लगातार बढेको बजारमा नाफा बुक गर्ने लगानीकर्ता सक्रिय भएसँगै नेप्से सामान्य प्रभावित भएको हो। छोटो समयमा नै कतिपय समूहमा राम्रो मुनाफा पाएपछि अल्पकालीन लगानीकर्ताले नाफा बुक गरेका छन्।
मंगलबार नेप्से परिसूचकसँगै कारोबार रकम पनि घटेको छ। सोमबार ४ अर्ब ६७ करोड ७ लाख ९८ हजार ७५६ रुपैयाँ बराबरको सेयर खरिद–बिक्री भएको थियो।
मंगलबार बिन्ध्यबासिनी हाइड्रोपावरको सेयर मूल्य सर्वाधिक ९.९९ प्रतिशतले बढेर प्रतिकित्ता मूल्य ४४७ रुपैयाँ १० पैसा कायम भएको छ।
त्यस्तै, सामलिङ पावर कम्पनीको सेयर मूल्य ९.९८ र हिमाल दोलखा हाइड्रोपावरको सेयर मूल्य ९.९७ प्रतिशतले बढेर प्रतिकित्ता मूल्य ५५९ रुपैयाँ र २५४ रुपैयाँमा कारोबार भएको छ।
यस दिन सेयर मूल्य सर्वाधिक घट्नेमा राष्ट्र उत्थान लघुवित्त र गुडविल फाइनान्सको ऋणपत्र रहेको छ।
राष्ट्र उत्थान लघुवित्तको सेयर मूल्य ४.२४ र गुडविल फाइनान्सको ऋणपत्रको मूल्य ३.९५ प्रतिशतले घटेर अन्तिम मूल्य क्रमशः एक हजार २८८ र एक हजार ३१ कायम भएको छ।
मंगलबार सर्वाधिक सेयर खरिद–बिक्री शिवम् सिमेन्टको भएको छ। कम्पनीको २९ करोड ३२ लाख रुपैयाँ बराबरको सेयर खरिद–बिक्री भएको हो। सो कम्पनीको सेयर मूल्य प्रतिकित्ता ८२८ रुपैयाँ कायम भएको छ। यो मूल्य अघिल्लो दिनको तुलनामा २.३६ प्रतिशतले घटेको हो।
सर्वाधिक सेयर खरिद–बिक्री हुने दोस्रो कम्पनीमा हिमालयन डिष्टिलरी रहेको छ। यस दिन उक्त कम्पनीको प्रतिकित्ता मूल्य तीन हजार ९५० रुपैयाँमा ९ करोड ९५ लाख रुपैयाँ बराबरको सेयर खरिद–बिक्री भएको छ।
त्यस्तै, आज कारोबारमा आएका १३ वटा समूहगत परिसूचकमध्ये छ वटा समूहको परिसूचक बढेको छ भने बाँकी सात समूहको परिसूचक घटेको छ।
यस दिन व्यापार समूहको परिसूचक सर्वाधिक १.६९ प्रतिशतले बढेको छ भने वित्त र जलविद्युत समूहको परिसूचक १.१९ र १.११ प्रतिशतले बढेको हो।
त्यस्तै, अन्य समूहको परिसूचक सर्वाधिक १.०४ प्रतिशतले घटेको छ।
