अभियान लघुवित्त वित्तीय संस्था लिमिटेडले आजदेखि सर्वसाधारणका लागि साधारण सेयर (आइपिओ) को निष्कासन तथा बिक्री खुला गर्ने भएको छ।
कम्पनीले प्रतिसेयर एक सय अंकित नौ करोड ७५ लाख मूल्य बराबरका नौ लाख ७५ हजार कित्ता आइपिओ सर्वसाधारणमा निष्कासन गर्न लागेको हो।
कम्पनीको सार्वजनिक आह्वानपत्रअनुसार निष्कासन गर्न लागेको कुल नौ लाख ७५ हजार कित्ता शेयरमध्ये जारी पुँजीको ०.५ प्रतिशत अर्थात् १२ हजार पाँच सय कित्ता कर्मचारीका लागि छुट्टाएको छ।
पाँच प्रतिशत अर्थात् ४८ हजार सात सय ५० कित्ता सामूहिक लगानी कोषलाई सुरक्षित गरी बाँकी नौ लाख १३ हजार सात सय ५० कित्ता शेयर खरिदका लागि सर्वसाधारणले यही साउन २२ गतेसम्म आवेदन दिन सक्नेछन्।
उक्त अवधिमा माग बमोजिम आवेदन नपरे आगामी भदौ १ गतेसम्म समय थप हुने पत्रमा उल्लेख छ।
निष्कासन गरिएको सेयरमा लगानीकर्ताले न्यूनतम १० कित्तादेखि तीन हजार कित्ताका लागि आवेदन दिन सक्नेछन् ।
आवेदकले अनुमति प्राप्त सी–आस्वा सदस्य बैंक तथा वित्तीय संस्था र मेरो सेयरको वेबसाइट तथा एपमार्फत आवेदन दिन सक्ने कम्पनीले जनाएको छ।
कम्पनीको धितोपत्र निष्कासन तथा बिक्री प्रबन्धक मुक्तिनाथ क्यापिटल लिमिटेड रहेको छ। कम्पनीलाई इक्रा नेपालले इक्राएनपी आइआरबीबी माइनस रेटिङ प्रदान गरेको छ।
