राष्ट्र बैंकले बुधबार जारी गरेको एकीकृत निर्देशन अनुसार अब बैंकहरूले सेयरको धितोमा जारी गर्ने २५ लाख रूपैयाँभन्दा माथिको कर्जामा मात्रै एक सय ५० प्रतिशत जोखिम प्रावधान राखे पुग्ने भएको छ।
यसअघिसम्म यस्तो धितोमा जाने सबै कर्जामा तोकिएको दरमा जोखिम प्रावधान राख्नुपर्ने भएकोमा अब २५ लाखसम्मको कर्जामा जोखिम प्रावधान कम राख्न पर्ने भएको हो।
अब २५ लाखसम्मको कर्जाको लागि एक सय प्रतिशत मात्र यस्तो प्रावधान राखे हुने भएको छ।
ऋणपत्रको धितोमा जाने कर्जामा पनि शतप्रतिशत जोखिम प्रावधान राख्नुपर्ने व्यवस्था गरिएको छ। ऋणपत्रको धितोमा जाने कर्जामा यसअघि जोखिम प्रावधान राख्नु पर्ने व्यवस्था नै गरिएको थिएन।
बैंक तथा वित्तीय संस्थाहरूले व्यक्तिगत प्रयोजनका कर्जाहरू र यसको धितो सुरक्षण बीचको अनुपात काठमाडौं उपत्यकाभित्र बढीमा ३० प्रतिशत र अन्य स्थानको हकमा बढीमा ४० प्रतिशतसम्म मात्र कायम गर्नुपर्ने भएको छ।
अर्थात् काठमाडौंको जग्गा राखेर ऋणीले धितोको मूल्यको ३० प्रतिशत र काठमाडौं बाहिरको जग्गा राखेर त्यसको मूल्यको ४० प्रतिशत बराबर मात्रै कर्जा पाउने भएका हुन्।
यसअघि काठमाडौंको जग्गाको धितोमा त्यसको मूल्यको ४० र बाहिरको जग्गाको मूल्यको ५० प्रतिशत बराबर रकम कर्जा पाउथे।
निश्चित प्रयोजन नखुलेका ओभरड्राफ कर्जा, धितो कर्जा, सम्पत्ति कर्जा, व्यक्तिगत आवधिक कर्जा, सेयरको धितोमा प्रदान गरिएको कर्जा लगायत जुनसुकै शीर्षकका कर्जाको यो व्यवस्था लागू हुने भएको हो।
ग्राहकले यस्तो कर्जा ५० लाख रूपैयाँसम्म मात्र यस अघिदेखि कै व्यवस्थालाई समेत निरन्तरता दिएको छ।
