नेपाल टेलिकमले गत आर्थिक वर्षको चौथो त्रैमासिक वित्तीय विवरण सार्वजनिक गरेको छ। उक्त वित्तीय विवरण अनुसार कम्पनीको नाफा १७.६६ प्रतिशतले बढेको छ।
गत आर्थिक वर्ष ७ अर्ब १२ करोड ९४ लाख ४१ हजार रुपैयाँ रहेको कम्पनीको नाफा चालू आर्थिक वर्षको सोही अवधिमा १ अर्ब २५ करोड ६ लाख ४७ हजार रुपैयाँ वृद्धि भएर ८ अर्ब ३८ करोड ८८ हजार रुपैयाँ पुगेको छ ।
त्यस्तै, कम्पनीको कुल सञ्चालन आम्दानी ५.४४ प्रतिशतले बढेको छ। गत वर्ष ३५ अर्ब ९३ करोड ५६ लाख ८३ हजार रुपैयाँ रहेको कम्पनीको सञ्चालन आम्दानी यस वर्षको सोही अवधिमा १ अर्ब ९५ करोड ४२ लाख ७५ हजार रुपैयाँले वृद्धि भएर ३७ अर्ब ८८ करोड ९९ लाख ५८ हजार रुपैयाँ कायम भएको छ।
यसैगरी, कम्पनीको कुल आम्दानी ४४ अर्ब ३२ करोड १३ लाख ५८ हजार रुपैयाँ रहेको छ।
गत आर्थिक वर्षको चौथो त्रैमाससम्म ४२ अर्ब २० करोड ९९ लाख ३ हजार रुपैयाँ रहेको कम्पनीको आम्दानी चालू आर्थिक वर्षको सोही अवधिमा २ अर्ब ११ करोड १४ लाख ५४ हजार रुपैयाँ अर्थात् ५ प्रतिशतले बढेको हो।
