बैंक अफ काठमाण्डू (बिओके) र हिमालयन बैंकले मेलम्चीमा दिएको ग्यारेण्टी बापतको रकम फिर्ता पाएका छन्।
स्ट्याण्डर्ड चार्टर्ड बैंकको खातामा यस्तो ग्यारेण्टी बापतको रकम फिर्ता आएको हिमालयन बैंकका प्रमुख कार्यकारी अधिकृत अशोक राणाले जानकारी दिए।
मेलम्ची खानेपानी आयोजनासँग ठेक्का तोडेपछि चाइना कन्स्ट्रक्सन बैंकको तर्फबाट काउन्टर ग्यारेन्टी बसेका यी दुई नेपाली बैंकले यस्तो रकम फिर्ता पाएका हुन्।
०६५ चैतमा बिओकेले काउन्टर ग्यारेन्टीका रूपमा १४ लाख युरो र ६६ लाख अमेरिकन डलरको अग्रीम भुक्तानी दिएको थियो।
हिमालयन बैंकले ६६ लाख डलर पर्फमेन्स ग्यारेन्टी दिएको थियो। बैंकले ६६ लाख ५० हजार डलर करिब ८४ करोड ४५ लाख रुपैयाँ फिर्ता पाएको हो।
मेलम्ची खानेपानी आयोजनाको लागि चिनियाँ ठेकेदारका तर्फबाट अग्रीम भुक्तानी र पर्फर्मेन्स ग्यारेन्टी बसेको रकम चिनियाँ बैंकले नदिएपछि दश वर्षदेखि यी बैंकको करिब डेढ अर्ब रुपैयाँ फसेको थियो।
दश वर्षअघि मेलम्ची आयोजनाको निर्माण ठेक्का पाएको ठेकेदार चाइना रेलवे १५ ब्युरो ग्रुपको ग्यारेन्टरका रूपमा चाइना कन्स्ट्रक्सन बैंक कर्पोरेसन (सिसिबी) रहेको थियो।
मेलम्ची खानेपानी आयोजनाले चाइना रेलवेसँग ठेक्का तोडेपछि सिसिबीका तर्फबाट दुई नेपाली बैंकले पर्फर्मेन्स ग्यारेन्टी र अग्रीम भुक्तानी दिएका थिए।
चाइना रेलवेले मेलम्चीसँगको ठेक्का ०६९ भदौमा तोडेपछि राष्ट्र बैंकले हिमालयन बैंकबाट सो रकम जफत गरी मेलम्चीलाई भुक्तानी दिएको थियो।
