कुमारी बैंक लिमिटेडले भदौ १७ गतेदेखि ऋणपत्र बिक्री खुला गर्ने भएको छ।
बैंकले वार्षिक ११ प्रतिशत ब्याजदरको ‘११ प्रतिशत केबिएल डिबेन्चर २०८९’ निष्कासन गर्ने भएको हो। सो ऋणपत्रको अवधि १० वर्ष रहनेछ।
बैंकले प्रतिकित्ता एक हजार रुपैयाँ अंकित दरको तीन अर्ब रुपैयाँ बराबरको ३० लाख कित्ता ऋणपत्र निष्कासन गर्न लागेको हो।
जसमध्ये ४० प्रतिशत अर्थात् एक अर्ब २० करोड रुपैयाँ बराबरको १२ लाख कित्ता सर्वसाधारणलाई विक्री गरिनेछ भने बाँकी रहेको ६० प्रतिशत अर्थात एक अर्ब ८० करोड रुपैयाँ बराबरको १८ लाख कित्ता व्यक्तिगत तवरबाट विक्री गरिने छ।
सर्वसाधारणलाई निष्कासन गरिनेमध्ये पाँच प्रतिशत अर्थात् ६० हजार कित्ता ऋणपत्र सामूहिक लगानी कोषहरूका लागि छुट्याइएको छ।
उक्त ऋणपत्र खरिदका लागि भदौ २१ गतेसम्म आवेदन दिनु पर्नेछ। उक्त अवधिसम्ममा माग बमोजिम आवेदन नपरेमा निष्कासन अवधि भदौ ३१ गतेसम्म लम्बिने बैंकले बताएको छ।
आवेदकले न्यूनतम २५ कित्तादेखि अधिकतम १२ लाख कित्ताका लागि आवेदन दिन सक्नेछन्।
बैंकको ऋणपत्रलाई इक्रा नेपालले इक्रा एनपी आइआर त्रिपल बी रेटिङ प्रदान गरेको छ। यसले वित्तीय दायित्व समयमा नै पूरा गर्न सक्ने तथा कर्जा जोखिम न्यून भएको संकेत गर्छ।
बैंकको ऋणपत्र निष्कासन तथा विक्री प्रबन्धकमा नबिल इन्भेष्टमेन्ट बैंकिङ लिमिटेड रहेको छ।
आवेदकले मेरो सेयर एप र वेवसाइटबाटका साथै सी–आस्बा सदस्य बैंक तथा वित्तीय संस्था र तिनका शाखा कार्यालयहरूबाट सो ऋणपत्र खरिदका लागि आवेदन दिन सक्नेछन्।
