एनआइसी एशिया बैंकको मोबाइल बैंकिङ एपबाट अब नेपाल क्लियरिङ हाउसको 'नेपाल पे' को क्युआर स्क्यान गरी डिजिटल भुक्तानी गर्न सकिने भएको छ।
उक्त विषयमा बैंक र नेपाल क्लियरिङ हाउसबीच सम्झौता सम्पन्न भएको छ।
सो सम्बन्धी सम्झौतापत्रमा बैंकको तर्फबाट नायव प्रमुख कार्यकारी अधिकृत सुधिर नाथ पाण्डे र क्लियरिङ हाउसको तर्फबाट प्रमुख कार्यकारी अधिकृत नीलेश मान सिंह प्रधानले हस्ताक्षर गरेका हुन्।
अब मोबाइल बैंकिङ एप प्रयोगकर्ताहरूले नेपालका विभिन्न स्थानका मर्चेन्टहरूसँग रहेको नेपाल पे को क्युआर स्क्यान गरी सहज रूपमा भुक्तानी गर्न सक्नेछन्।
नेपालमा पछिल्लो पटक डिजिटल कारोबार बढिरहेको परिप्रेक्षमा नेपाल पेसँगको सहकार्यबाट डिजिटल कारोबारलाई थप नयाँ उचाइमा पुर्याउन सहयोग पुग्ने विश्वास बैंकले लिएको छ।
बैंकले मुलुकभर रहेका ३५९ शाखा कार्यालय, ४७३ एटिएम, १०२ वटा विस्तारित काउन्टर एवं ८१ वटा शाखारहित बैंकिङमार्फत् बैंकिङ सेवा प्रदान गर्दै आइरहेको छ।
