असोज मसान्त नजिकिदै गर्दा बैंक तथा वित्तीय संस्थाहरुबाट कर्जा लिएर लगानी गर्नेहरु मार्जिन कलको दबाबमा परेसँगै बजारको वृद्धि प्रयास असफल भइरहेको छ।
असोज मसान्तमा सेयर धितो कर्जा लिएका लगानीकर्ताहरुले किस्ता बुझाउनुपर्ने हुन्छ। धितोमा राख्दाको समयमा भन्दा मूल्य घटेको अवस्थामा या त धितो बढाउनुपर्छ या त कर्जा भुक्तानी गरेर सल्टाउनुपर्छ। यही दबाबले बजार १९ सय नजिक पुगेर फेरि ओरालो लाग्ने क्रममा छ।
मंगलबार पनि नेप्से परिसूचक १८५० को तहसम्म ओर्लिएपछि बढ्ने प्रयासमा देखिएको छ। तर, नेप्सेको यस्तो प्रयास सफल भएन र बजार बन्द हुँदा नेप्से १६.०६ अंकले घटेर १८५५ बिन्दुमा आईपुगेको छ।
हालसम्म १५ संस्था (सामूहिक लगानी कोष बाहेक)ले लाभांश घोषणा गरेका भएपनि बजारमा त्यसको खासै प्रभाव परेको देखिदैन। विहीबार बुक क्लोज रहेको रुरु जलविद्युत्को मंगलबार मूल्य सात प्रतिशतभन्दा धेरैले बढेर आठ सय २५ रुपैयाँमा कारोबार भइरहेको छ। लाभांश घोषणा गरेका अन्य कम्पनीमा भने खासै आकर्षण देखिएको छैन। यीमध्ये १४ वटा कम्पनीले दिन लागेको लाभांश अझै हात पार्न सकिने अवस्था छ। केहीले बाहेक धेरैको बुक क्लोज मिति घोषणा भइसकेको छैन।
मंगलबारको नबिल बैंक, नेपाल लाइफ इन्स्योरेन्स जस्ता कम्पनीको कारोबार उच्च दरमा भएको छ। यी कम्पनीको सेयर कारोबार दुई देखि तीन करोड रुपैयाँसम्म पुगेको छ। यस दिन बजारमा ५५ करोड रुपैयाँको सेयर किनबेच भएको छ। कुल बजार पुँजीकरण २६ खर्ब ६६ अर्ब रुपैयाँ पुगेको छ।
यस दिन दुई सय २९ धितोपत्र तथा ऋणपत्र कारोबार भएकोमा ५३ वटाको मूल्य बढेको र एक सय ७१ वटाको मूल्य घटेको छ।
