नेपाल स्टक एक्सचेन्ज (नेप्से) को बुधबार बसेको सञ्चालक समितिको बैठकले आवेदन दिएका १० ब्रोकर कम्पनीलाई धितोपत्र बोर्ड समक्ष अनुमतिको लागि सिफारिश गर्ने निर्णय गरेको छ।
नेप्सेमा ब्रोकर सदस्यताका लागि क्यापिटल म्याक्स सेक्युरिटिज, प्रोपर्टी बिगाड, कलश सेक्युरिटिज, माछापुच्छ्रे सेक्युरिटिज, भोलेनलेज सेक्युरिटिज, सेयर ब्रो सेक्युरिटिज, प्रभु स्टक, एनएमबी सेक्युरिटिज, हिमालन ब्रोकरेज र केबिएल सेक्युरिटिजको आवेदन परेको छ।
हालै पाँचौं संशोधन गरिएको धितोपत्र व्यवसायी नियमावली २०६४ ले यसअघि बजार सञ्चालक (नेप्से) को सिफारिशपछि धितोपत्र बोर्डले अन्तिम स्वीकृति दिने व्यवस्था परिमार्जन गरेको थियो। यससँगै ब्रोकरको लागि नेप्सेको सिफारिश नचाहिने मानिएको थियो।
तर, धितोपत्र ऐनमा नै धितोपत्र बजार सञ्चालकको सिफारिश आवश्यक पर्ने उल्लेख भएपछि नेप्सेको सिफारिशमा मात्रै बोर्डले ब्रोकर छनोट गर्न पाउने भएको छ।
धितोपत्र ऐनको दफा ५७ को उपदफा २ को ‘ग’ मा धितोपत्र बजारको सदस्यता लिएर मात्र व्यवसाय गर्न पाउने तोकिए बमोजिमका व्यवसायीका हकमा सम्बन्धित धितोपत्र बजारको सिफारिस पत्र चाहिने उल्लेख छ।
