राष्ट्र बैंकले प्रकाशित गरेको तथ्यांक अनुसार मंगलबार एकै दिन वाणिज्य बैंकहरूको निक्षेप ३१ अर्ब रूपैयाँले घटेको छ। सोमबार वाणिज्य बैंकहरूमा ४५ खर्ब १२ अर्ब रूपैयाँ निक्षेप रहेकोमा मंगलबार ४४ खर्ब ८१ अर्ब रूपैयाँमा सीमित भएको छ।
वाणिज्य बैंकहरूको कुल कर्जा लगानी पनि दुई अर्बले घटेर ४१ खर्ब ८३ अर्ब रूपैयाँमा सीमित भएको छ। समग्र बैंक तथा वित्तीय संस्थाहरुमा समेत यो एक दिनमा ३० अर्बले निक्षेप घटेर ५० खर्ब ८७ अर्बमा सीमित भएको छ भने कर्जा लगानी दुई अर्बले नै घटेर ४७ खर्ब २३ अर्बमा सीमित भएको छ।
बैंक तथा वित्तीय संस्थाको कर्जा निक्षेप अनुपात ८७.२० बाट बढेर ८७.८१ प्रतिशत पुगेको छ। यता नेपाल बैंकर्स एशोसिएशनले सार्वजनिक गरेको तथ्यांक अनुसार असोज १४ देखि २१ गतेबीचमा आठ अर्बले निक्षेप घटेको छ। असोज २१ सम्ममा बाणिज्य बैंकमा ४५ खर्ब ११ अर्ब निक्षेप छ। यो बीचमा कर्जा लगानी भने पाँच अर्बले घटेर ४१ खर्ब ९३ अर्बमा सीमित भएको छ।
सोमबार नेपाल आयल कर्पोरेशनले इण्डियन आयल कर्पोरेशनलाई ४ अर्ब ८० करोड भुक्तानी दिएपछि पनि केही मात्रामा निक्षेप घटेको हो। बिहीबार समेत नेपाल आयल निगमले थप रकम भुक्तानी गर्ने तयारी गरिरहेको छ। यसैबीच राष्ट्र बैंकले असोज २७ मा ३० अर्ब बराबर नै बैंकहरुमा तरलता पठाउँदैछ। राष्ट्र बैंकले सात दिने अवधिको ३० अर्ब रूपैयाँ बराबरको रिपो जारी गर्न लागेको हो।
