नबिल बैंकले 'नबिल फोनलोन (Foneloan)' को न्यूनतम सीमा र आफ्नो डिजिटल फाइनान्सिङ प्रडक्टको दायरा बढाएको छ।
यसअघि नबिल फोनलोनको सीमा १ लाख रहेकामा त्यसलाई बढाएर अब २ लाख रूपैयाँ पुर्याइएको बैंकले जनाएको छ। यसका अतिरिक्त यस्तो लोन लिन योग्य समूहको दायरा पनि केही बढाइएको पनि बैंकले जानकारी दिएको छ।
नबिलका अनुसार फोनलोनको अवधारणा कार्यान्वयनमा ल्याउने देशकै पहिलो बैंक हो। अब नबिलमा नियमित बचत खाता सञ्चालन गर्ने ग्राहक तथा नबिलसँग आबद्ध क्युआर मर्चेन्टहरू पनि फोनलोनका लागि योग्य हुनेछन्। यसअघि नबिलमा तलब खाता भएकाहरूले मात्र यस्तो ऋणको सुविधा पाइरहेका थिए।
यस्तै बैंकले फोनलोनका अफरहरूलाई पनि विस्तार गरेको छ। अब यस्तो ऋणका लागि योग्य ग्राहकहरूले नबिल स्मार्ट बैंक एपको स्क्रिनमा फोनलोन (Foneloan) को आइकन देख्नेछन्। बैंकले ग्राहकहरूको सुविधाका लागि 'Buy now, pay later' को सुविधा तथा ऋणबापत लिएको रकम चुक्ता गर्न इएमआईको सुविधा समेत उपलब्ध हुने भएको छ।
ग्राहकहरूले खरिद गर्दा कुनै पनि फोन पे मर्चेन्ट क्युआर कोडहरू स्क्यान गर्न सक्छन् र आफ्नो खरिदको मासिक किस्तामा भुक्तानी गर्न चेकआउटको बेला 'Buy now, pay later' को विकल्प रोज्न सक्छन्।
आफ्नो फोनलोन बक्यौता चाँडै तिर्न खोज्ने ग्राहकहरूले आफ्नो फोनलोन सिधै आफ्नो एपबाट प्रिपे गर्ने विकल्प पनि उपलब्ध हुनेछ। यस अन्तर्गत नबिल बैंकले कुनै पूर्वभुक्तानी शुल्क नलिई ग्राहकहरूको खातामा पर्याप्त रकम भएमा ऋणको तत्काल निकासी गर्न अनुमति दिने जनाएको छ।
'नेपालमा बैंकिङ अझै पनि विकासको प्रक्रियामा छ, तर अहिले मुख्यतया कानुनी र नियामक व्यवस्थाका कारण र एनपिए व्यवस्थापनमा सहजताका कारण धितोमा आधारित ऋणमा केन्द्रित छ,' नबिल बैंकका एसएमई एन्ड माइक्रोफाइनान्स प्रमुख निरज बस्नेत (डनिल) ले बताए।
'हालैका दिनहरूमा हाम्रो जोखिमबहन क्षमता बढ्दै गए पनि, हामीले धितोमा आधारित ऋण (Collateral-based loan) बाट व्यवहार र नगद प्रवाहमा आधारित क्रेडिट (Behavioral and cash flow-based credit) मा सर्न आवश्यक छ। यही उद्देश्य प्राप्तिमा फोनलोनको स्वचालित क्रेडिट अन्डरराइटिङ र ऋण व्यवस्थापन पहिलो चरण हो,' उनले थपे, 'हामी यो प्रडक्टको प्रभावकारिता, साथै ग्राहकको मागप्रति पनि विश्वस्त छौं। यहीकारण पनि नबिलले फोनलोनको सीमा र योग्य समूहको दायरा बढाएको हो।'
