ई–सेवा मनी ट्रान्सफर र संयुक्त अरब इमिरेट्स्को इमिरेट्स इण्डिया इन्टरनेसनल एक्सचेञ्जबीच रेमिटेन्स भुक्तानी सम्झौता भएको छ।
यो सम्झौतासँगै युएईमा स्थायी रूपमा तथा कामको शिलशिलामा बसोबास गर्दै आएका नेपालीहरूले, इमिरेट्स इण्डियाका संयुक्त अरब इमिरेट्स (युएई) स्थित युएइ, अबुधाबी, सारजाहलगायत अधिकांश स्थानमा रहेका ३३ वटा शाखाबाट सुरक्षित र विश्वासिलो तवरले डिजिटल माध्यमबाट रेमिटेन्स पठाउन सकिनेछ।
इमिरेट्स इण्डियामार्फत नेपालमा आफ्ना आफन्त तथा इष्टमित्रलाई, जुनसुकै बैंक तथा वित्तीय संस्थाको खातामा तथा पाउने व्यक्तिको ई–सेवा वालेटमा तुरुन्तै रकम पठाउन सकिनेछ।
यसका साथै इमिरेट्स इण्डियाको वेबसाइटबाट पनि अनलाइन सेवा प्रयोग गरी ई–सेवामनी ट्रान्सफरमार्फत नेपालमा पैसा पठाउन सकिनेछ भने निकट भविष्यमै कम्पनीको मोबाइल एपबाट पनि यो सेवा उपलब्ध हुने बताइएको छ।
हाल ई–सेवामनी ट्रान्सफरको 'मेरो डिजिटल देश' अभियान जारी रहेको हुनाले इमिरेट्स इन्डियाको माध्यम हुँदै युएईबाट सोझै बैंक खाता वा ई–सेवा वालेटमा पैसा पठाउँदा ६ महिनाको अवधिसम्म हरेक महिना एक जना सेवाग्राहीले आकर्षक उपहार तथा योजनाको अन्त्यमा एक जनाले काठमाडौंमा घर समेत जित्न सक्नेछन्।
इमिरेट्स इण्डियामार्फत आफ्ना आफन्त तथा इष्टमित्रलाई नगद रेमिटेन्स पनि पठाउन सकिनेछ। जसलाई नेपालभर रहेका ई–सेवा मनी ट्रान्सफरका एक लाख १२ हजारभन्दा धेरै एजेन्ट नेटवर्कको सञ्जालबाट प्राप्त गर्न सकिनेछ।
साथै, इमिरेट्स इण्डियामार्फत आएको नगद रेमिटेन्स आफ्नो ई–सेवा वालेटमा प्राप्त गर्दा सेवाग्राहीले थप २०० रुपैयाँ बोनस समेत पाउनेछन् भने मेरो डिजिटल देश अभियानमा सहभागी भई उपहारहरू जित्न सक्नेछन्।
रेमिटेन्स् भुक्तानी सम्झौतामा ई–सेवामनी ट्रान्सफरका तर्फबाट प्रमुख कार्यकारी अधिकृत अजेस कोइराला र इमिरेट्स इण्डियाकातर्फबाट जनरल म्यानेजर अली मोहम्मद एलम्रानीले हस्ताक्षर गरेका थिए।
इमिरेट्स इण्डियासँगको रेमिटेन्स सम्झौताबारे सिइओ कोइरालाले भने, 'युएई नेपालीहरूको प्रमुख रोजगार गन्तव्य भएकाले इमिरेट्स इण्डिया जस्तो पहिलादेखि नै स्थापित अन्तर्राष्ट्रिय एक्सचेञ्ज कम्पनीसँग रेमिटेन्स साझेदारी गर्न पाउँदा एकदमै उत्साहित छौँ।'
इमिरेट्स इण्डिया इन्टरनेसनल एक्सचेञ्ज सन् १९८० मा स्थापित भएर युएइमा बैंक ट्रान्सफर, अन्तर्राष्ट्रिय मुद्रा एक्सचेञ्ज, मोबाइल मनी ट्रान्सफर लगायतका आधुनिक प्रविधिका डिजिटल सेवाहरू प्रदान गर्दै आइरहेको छ।
ई–सेवा मनी ट्रान्सफरले परम्परागत शैली तथा डिजिटल माध्यमबाट ई–सेवा वालेटका ५० लाखभन्दा बढी प्रयोगकर्ताहरू र ६० भन्दा बढी बैंक खातामा विप्रेषण रकम भित्राउँदै आएको छ।
