तिहार छठको बिदापछिको पहिलो कारोबार दिन सोमबार नेप्से परिसूचक १६.३९ अंकले बढेको छ।
आज नेप्से ०.८८ प्रतिशतले बढेर १८७४.८७ बिन्दुमा पुगेर बन्द भएको हाे।
तिहारको बिदा अघि पनि नेप्से १४.३५ अंकले बढेर बन्द भएको थियो। यसरी हेर्दा नेप्सेले सकारात्मक गति लिन खोजेको देखिन्छ।
यस दिन २२४ वटा धितोपत्रको ६९ करोड ७३ लाख १७ हजार ६११ रुपैयाँ बराबरको कारोबार भएको छ।
अघिल्लो दिनको तुलनामा यस दिन कारोबार रकम पनि बढेको छ। तिहारको बिदा अघिको कारोबार दिन ५१ करोड ६८ लाख ३ हजार ४८४ रुपैयाँ बराबरको सेयर कारोबार भएको थियो।
सोमबार सयपत्री हाइड्रोपावरको सेयर मूल्यमा सकारात्मक सर्किट लागेको छ। कम्पनीको सेयर मूल्य १० प्रतिशतले वृद्धि भएर प्रतिकित्ता मूल्य ३१३ रुपैयाँ ५० पैसामा बन्द भएको छ।
त्यस्तै, एसबिआई बैंकको सेयर मूल्य ८.२४ प्रतिशतले बढेर प्रतिकित्ता मूल्य २८९ रुपैयाँ कायम भएको छ।
यस दिन सेयर मूल्य सर्वाधिक घट्नेमा अपर हेवाखोला हाइड्रोपावर रहेको छ। कम्पनीको सेयर मूल्य ८.१६ प्रतिशतले घटेर प्रतिकित्ता मूल्य ३३९ रुपैयाँ ८० पैसामा झरेको छ।
त्यस्तै, रुरु जलविद्युत परियोजनाको सेयर मूल्य ६.५८ प्रतिशतले घटेर प्रतिकित्ता मूल्य ७८१ रुपैयाँ कायम भएको छ।
यस दिन सर्वाधिक सेयर खरिद–बिक्री एनआइसी एशिया बैंकको भएको छ। कम्पनीको ६६० रुपैयाँमा ६ करोड १७ लाख रुपैयाँ बराबरको सेयर खरिद–बिक्री भएको हो।
यो मूल्य अघिल्लो दिनको तुलनामा ६.८० प्रतिशतले बढेको हो।
सर्वाधिक सेयर खरिद–बिक्री हुने दोस्रो सूचीमा एभरेष्ट बैंक रहेको छ। उक्त बैंकको ५३३ रुपैयाँमा ४ करोड ३९ लाख रुपैयाँ बराबरको सेयर कारोबार भएको छ।
त्यस्तै, आज कारोबारमा आएका १३ वटा समूहगत परिसूचकमध्ये विकास बैंक समूहको परिसूचक ०.३९ प्रतिशतले घटेको छ भने बाँकी सबै समूहको परिसूचक बढ्दा समग्र नेप्से बढेको हो।
यस दिन होटल्स तथा पर्यटन समूहको परिसूचक सर्वाधिक १.६५ प्रतिशतले बढेको छ।
त्यस्तै, अन्य समूहको परिसूचक १.५९ प्रतिशत, बैंकिङ समूहको परिसूचक १.५२ प्रतिशत र व्यापार समूहको परिसूचक १.१४ प्रतिशतले बढेको छ।
