नेप्से बढ्ने क्रमले बुधबार पनि निरन्तरता पाएको छ। आज नेप्से परिसूचक ७.१९ अंकले बढेको छ।
बुधबार नेप्से ०.३७ प्रतिशतले बढेर १९३८.१६ बिन्दुमा पुगेर बन्द भएको छ।
तिहारपछि दैनिक कारोबार रकम बढिरहेकाले लगानीकर्ता उत्साहित भएको देखिन्छ। नेप्से परिसूचकसँगै कारोबार रकम पनि दैनिक बढिरहेको छ।
मंगलबार १ अर्ब २९ करोड ६ लाख ६४ हजार ६४१ रुपैयाँ बराबरको कारोबार भएकोमा त्यो रकम बढेर आज १ अर्ब ४६ करोड ७९ लाख १४ हजार ८७५ रुपैयाँ पुगेको छ।
यस दिन २२७ धितोपत्रको ४३ लाख ४६ हजार कित्ता सेयर किनबेच भएको छ।
बुधबार कर्पोरेट डेभलपमेन्ट बैंकको सेयर मूल्य सर्वाधिक वृद्धि भएको छ। उक्त कम्पनीको सेयरमूल्य ८.७४ प्रतिशतले वृद्धि भएर प्रतिकित्ता मूल्य २८८ रुपैयाँ ५० पैसामा बन्द भएको छ।
त्यस्तै, कर्णाली डेभलपमेन्ट बैंकको सेयर मूल्य ८.११ प्रतिशतले बढेर प्रतिकित्ता मूल्य २४० रुपैयाँ कायम भएको छ।
यस दिन सेयर मूल्य सर्वाधिक घट्नेमा सबैको लघुवित्त रहेको छ। उक्त कम्पनीको सेयर मूल्य ३.९६ प्रतिशतले घटेर प्रति कित्ता मूल्य ९९४ रुपैयाँमा झरेको छ।
त्यस्तै, महुली लघुवित्तको सेयर मूल्य ३.५० प्रतिशतले घटेर प्रति कित्ता मूल्य ९९४ रुपैयाँ कायम भएको छ।
यस दिन सर्वाधिक सेयर खरिद–बिक्री शिवम् सिमेन्टको भएको छ। कम्पनीको ६८५ रुपैयाँमा ७ करोड ८५ लाख रुपैयाँ बराबरको सेयर खरिद–बिक्री भएको हो।
यो मूल्य अघिल्लो दिनको तुलनामा २ प्रतिशतले घटेको हो।
सर्वाधिक सेयर खरिद–बिक्री हुने दोस्रो सूचीमा नबिल बैंक रहेको छ। उक्त बैंकको ८३० रुपैयाँमा ५ करोड ६६ लाख रुपैयाँ बराबरको सेयर कारोबार भएको छ।
त्यस्तै, आज कारोबारमा आएका १३ वटा समूहगत परिसूचकमध्ये बैंकिङ, व्यापार र निर्जीवन बीमा समूहको परिसूचक घटेको भने बाँकी सबै समूहको परिसूचक बढेको छ।
यस दिन अन्य समूहको परिसूचक सर्वाधिक १.४४ प्रतिशतले बढेको छ भने व्यापार समूहको परिसूचक सर्वाधिक १.२३ अंकले घटेको छ।
