साताको पहिलो कारोबार दिन आइतबार नेप्से परिसूचक ४३.२० अंकले बढेको छ।
आइतबार नेप्से २.२५ प्रतिशतले बढेर १९६५.३६ बिन्दुमा पुगेर बन्द भएको छ।
लाभांशको सिजन चलिरहेको, वाणिज्य बैंकहरूको प्रथम त्रैमासिक रिपोर्ट औसतमा राम्रो आएकाले नेप्सेमा सुधार देखिएको छ।
त्यस्तै, चुनाव नजिकिँदै गर्दा बैंकिङ प्रणलीमा पुँजी भित्रिने अपेक्षामा सेयर बजार बढेको हो।
नेप्से परिसूचकसँगै आइतबार कारोबार रकम पनि बढेको छ।
अघिल्लो कारोबार दिन आर्थात् बिहीबार ८९ करोड ८९ लाख ७ हजार ८३० रुपैयाँ बराबरको कारोबार भएकोमा त्यो रकम बढेर आज १ अर्ब ५४ करोड ८० लाख ३२ हजार ५६१ रुपैयाँ पुगेको छ।
यस दिन २२८ धितोपत्रको ३९ लाख १३ हजार ५७३ कित्ता सेयर किनबेच भएको छ।
आइतबार मानुषी लघुवित्त, जाल्पा सामुदायिक लघुवित्त, नेष्डो समृद्ध लघुवित्त र उपकार लघुवित्तको सेयर मूल्यमा सकारात्मक सर्किट लागेको छ। यी चार वटै लघुवित्तको सेयर मूल्य १० प्रतिशतले बढेसँगै सर्किट लागेको हो।
मानुषी लघुवित्त सेयर मूल्य १ हजार १६९ रुपैयाँ ३० पैसा, जाल्पा सामुदायिक लघुवित्तको ३ हजार ४०८ रुपैयाँ ९० पैसा, नेष्डो समृद्ध लघुवित्तको ३ हजार १७३ रुपैयाँ ५० पैसा र उपकार लघुवित्तको सेयर मूल्य ३ हजार ६३९ रुपैयाँ ६० पैसा कायम भएको छ।
आज जाल्पा सामुदायिक लघुवित्तले ७६.८४ प्रतिशत लाभांशको घोषणा गरेसँगै लगानीकर्ताको आकर्षण लघुवित्तको सेयरमा देखिएको हो। अरु लघुवित्तले पनि जाल्पा सामुदायिकै अनुपातमा लाभांश दिने अपेक्षा लगानीकर्ताले गरेसँगै लघुवित्तको सेयरमा लगानीकर्ता झुम्मिएका हुन्।
त्यस्तै, यस दिन मूल्य सर्वाधिक घट्नेमा नबिल इक्विटी फण्ड र आरविवि म्युचुअल फण्ड–१ रहेको छ। दुवै योजनाको इकाइ मूल्य २.४८ र २.४० प्रतिशतले घटेर प्रति इकाइ मूल्य ८ रुपैयाँ ६५ पैसा र ७ रुपैयाँ ३२ पैसामा झरेको छ।
यस दिन सर्वाधिक सेयर नेष्डो समृद्ध लघुवित्तको भएको छ। कम्पनीको ३ हजार १७३ रुपैयाँ ५० पैसामा १० करोड १४ लाख रुपैयाँ बराबरको सेयर खरिद–बिक्री भएको हो।
सर्वाधिक सेयर खरिद–बिक्री हुने दोस्रो सूचीमा एभरेष्ट बैंक रहेको छ। उक्त कम्पनीको ५४० रुपैयाँमा ७ करोड ९ लाख रुपैयाँ बराबरको सेयर कारोबार भएको छ।
त्यस्तै, आज कारोबारमा आएका १३ वटा समूहगत परिसूचकमध्ये म्युचुअल फण्ड समूहको परिसूचक ०.०५ प्रतिशत प्रतिशतले घटेको भने बाँकी सबै समूहको परिसूचक बढ्दा समग्र नेप्से बढेको हो।
यस दिन लघुवित्त समूहको परिसूचक सर्वाधिक ४.५८ प्रतिशतले बढेको छ।
त्यस्तै, वित्त समूहको परिसूचक ४.०८ प्रतिशत, अन्य समूहको परिसूचक ४.०५ प्रतिशत, उत्पादन तथा प्रशोधन समूहको परिसूचक ३.८१ प्रतिशत र जलविद्युत समूहको परिसूचक ३.३५ प्रतिशतले बढेको छ।
