नेपाल राष्ट्रिय व्यवसायी महासंघले बैंकको ब्याजदरमाथि केन्द्रीय बैंकले हस्तक्षेप गर्नुपर्ने बताएको छ।
महासंघका अध्यक्ष कुमार कार्कीले प्रेस विज्ञप्ति जारी गरी बैंकहरूले अचाक्ली ब्याजदर बढाएको भन्दै हस्तक्षेप जरूरी रहेको बताएका हुन्।
महासंघले बैंकको ब्याजदर एक अंकमा सीमित हुनुपर्ने जनाएको छ। बैंकहरूले संकटका बेला ब्याज बढाएर सामान्य मानवीयता समेत ख्याल नगरेको भन्दै महासंघले लिलामीको ३५ दिने सूचनालाई बढाएर छ महिना बनाउनुपर्ने माग गरेको छ।
'संकटको अवस्थामा सामान्य मानवीयता पनि नहेरी पत्रपत्रिकामा ३५ दिने सूचना निकाल्ने र करोडौं मूल्य पर्ने सम्पत्तिलाई थोरै ऋण लिएका भरमा लिलामी गरेर वित्तीय संस्थाले असुल गर्ने कोसिस गरेको पाइएको छ,' अध्यक्ष कार्कीले जारी गरेको विज्ञप्तिमा भनिएको छ, 'धितोलिलाम गर्ने सूचना ३५ दिन होइन कम्तीमा पनि ६ महिना हुनु पर्छ र लिलामी गर्नुअघि ऋण चुक्ता गर्न एक वर्षको अवधि दिनुपर्छ।'
