सेयर बजार परिसूचक नेप्से पाँच महिनादेखि तीन सय ६८ बिन्दु रेञ्जमा घटबढ भइरहेको छ।
मंसिर ४ को चुनावपछि बजारमा सुधार आउनसक्ने अपेक्षा धेरैले गरिरहेका छन्। मुलतः बैंकहरूले निक्षेपको ब्याजदर नबढाएको र असोजमा आउँदा मुलुकको बाह्य क्षेत्र दबाब कम हुँदै गएको कारण पनि बजारले केही समय वृद्धि समात्ने अपेक्षा गरिएको छ।
त्यस्तै, चुनावपछि हाल रोकिएको ब्रोकर थप्ने प्रक्रिया पुनः शुरु हुने देखिएकोले यसले पनि लगानीकर्ताको मनोविज्ञान सकारात्मक हुन सक्ने अनुमान गरिएको छ।
यति हुँदा हुँदै पनि बजारमा पुँजी अभावको समस्या नसल्टिएकोले बजारले धेरै ठूलो वृद्धि भने हासिल गर्न सक्ने सम्भावना कम रहेको सेयर विश्लेषक राजन तिवारी बताउँछन्।
'बजारमा ठूलो लगानी नआउँदासम्म उच्च दरमा वृद्धि हुन कठिन देखिन्छ,' तिवारीले भने, 'अहिले सेयर बजारमा लागेका उद्योगी व्यवसायीहरूसँग पनि लगानीयोग्य पैसा छैन्।'
निर्वाचनको कारण बैंकिङ प्रणालीमा पुँजी भित्रिने अपेक्षा गरिएको भएपनि यसअघिको स्थानीय चुनावमा समेत त्यस्तो प्रवृत्ति नदेखिएकोले यसपटक पनि त्यसको सम्भावना कम नै रहेको तिवारीको भनाइ छ।
रेमिटेन्स बढेर बैंकहरूको तरलतामा केही सहज भएपनि बैंकहरूले जारी गर्ने कर्जाको ब्याजदर घट्ने गरेर समाधान नदेखिएकोले पनि बजार बढ्न नसकिरहेको तिवारीको विश्लेषण छ।
सेयर लगानीकर्ता निरव पुडासैनी पनि तत्काललै बजार बढ्ने सम्भावना कम देख्छन्।
'मैले व्यक्तिगत रूपमा अहिले सेयरमा लगानी गरिरहेको छैन्,' पुडासैनीले भने, 'अहिले विश्वव्यापी रूपमा मन्दिको सम्भावना छ, अरू केहीले फरक नपरेपनि संसारभर हुने मूल्य वृद्धिको प्रभाव नेपालमा पनि पर्छ', 'मुलुककै अर्थतन्त्रमा पनि ठूलो सुधार देखिएको छैन।'
पुडासैनी अहिले लगानीयोग्य बचत भएका मानिसहरूले पनि लगानी थप्दै गर्न सक्ने तर प्रतिफल पाउन भने केही समय पर्खनुपर्ने बताउँछन्।
गत साता सेयर बजार परिसूचक ४३.१३ प्रतिशतले बढेर १९३६ मा बजार बन्द भएको छ। कारोबार रकममा भने २६.४९ प्रतिशतले कमी आएर पाँच अर्ब ३१ करोडमा सीमित भएको छ।
प्राविधिक विश्लेषण
नेप्सेको मैनवत्ति चित्रमा अन्तिम दुई दिनमा सेतो (हरियो) मैनवत्ति आकृति बनाएको छ। यसमा पहिलो दिनको मैनवत्तिको शरीरको माथिल्लो भागभन्दा केही दुरी सहित दिनको मैनवत्ति सुरू भएको छ। यसले बजार बढ्ने संकेत गरिरहेको छ।
नेप्सेको रेखाचित्रमा बनाइएको ७ दिने र २१ दिने मुभिङ एभरेज रेखा एक अर्कासँग नजिकिएका छन्। माथि रहेको ७ दिने मुभिङ एभरेज रेखा क्रमशः तल आएर २१ दिने रेखासँग जोडिन लागेको छ।
७ दिने रेखाले २१ दिने रेखालाई काटेर माथि लाग्ने प्रयास गरेमा भने बुलिश (बढ्ने) प्रवृत्ति सुरू हुने मानिन्छ। भने, २१ दिने रेखाले ७ दिने रेखालाई काटेर माथि लागेमा वियरिश प्रवृत्तिमा बजार रहेको मानिन्छ।
बजार सन्तुलित अवस्थामा रहेको नेप्सेको १४ दिने आरएसआई सूचक विश्लेषणले देखाउँछ।
गत बिहीबार यो ६३.५९ बिन्दुमा छ। बुधबार ६२.११ बिन्दुमा थियो। आरएसआई सूचक ३० मुनि भएमा बजार अवमूल्यन भएको र अधिक बिक्री बढेको संकेत गर्छ।
त्यस्तै, ७० माथि भए अधिकमूल्यन भइरहेको र खरिदारी उच्च दरमा बढेको संकेत गर्छ। ३० देखि ७० बीचमा रहे सन्तुलित अवस्थामा रहेको विश्लेषण गरिन्छ।
यस साता १९३९ मा उच्च बिन्दु बनाएको नेप्सेको पिभट विश्लेषण अनुसार बजारले आगामी साता १९५७ मा पहिलो लक्ष्य पाउने देखिन्छ।
त्यस्तै, त्यो बिन्दुमा पुगेर घटेमा १८९७ मा पहिलो टेवा पाउने सम्भावना छ।
