दोलखाको कुरी उपत्यकामा केबल कार सञ्चालन गरिरहेको कालिञ्चोक दर्शन लिमिटेडले प्राथमिक सेयर (आइपिओ)जारी गर्न अनुमति पाएको छ।
धितोपत्र बोर्डले कात्तिक २३ मा यस्तो स्वीकृति दिएको हो। ६० करोड रूपैयाँ चुक्ता पुँजी रहेको कम्पनीको १२ करोड रूपैयाँको सेयर जारी गर्न लागेको हो।
कम्पनीले आर्थिक वर्ष २०७७/७८ मा तीन करोड ६९ लाख रूपैयाँ आम्दानी गरेको छ। कम्पनीले ३५ कोठाको होटल निर्माणमा करिब २५ करोड लगानी गर्ने रणनीति बनाएको छ।
आइपिको जारी गरेर उठ्ने केही रकम समेत यसमा लगानी गरिने र थप रकम संस्थापकहरूले हाल्ने निर्णय गरिएको थियो।
कम्पनीको आयोजना माथिल्लो भेगमा रहेको कारण भौगोलिक जटिलताको चुनौती भने सदैव रहने देखिन्छ।
आर्थिक वर्ष २०७७/७८ मा २२ करोड ऋण रहेको थियो भने २९ करोड सेयर लगानी भएको थियो। आर्थिक वर्ष २०७८/७९ को सुरूको ६ महिनामा संस्थापकहरूले थप १८ लाख ५० हजार लगानी थपेका छन्।
आर्थिक वर्ष २०७८/७९ को सुरूको ६ महिनामा भने त्यहा पुग्ने पर्यटकको संख्यामा कमी आएको थियो।
सो समय ५० हजार अन्तरिक तथा बाह्य पर्यटक पुग्दा दुई करोड १० लाख आम्दानी गरेको थियो। सोभन्दा अघिल्लो वर्ष भने ९० हजारले भ्रमण गर्दा तीन करोड ७० लाख आम्दानी गरेको थियो।
त्यहासम्म पुग्ने बाटो पिच भइरहेकोले आन्तरिक पर्यटक बढ्ने अनुमान गरिएको छ। हाल कम्पनीले सञ्चालन गरिरहेको केबल कारले भने प्रतिघण्टा एक सय ९२ यात्रु (एकतर्फी)लाई सेवा दिन सक्छ।
बालकृष्ण सिवाकोटी अध्यक्ष रहेको कम्पनीमा थानेश्वर बस्याल, गुरु अधिकारी, ऋषिकेश गौली लगायतका सञ्चालकहरू छन्।
कम्पनीमा एक संस्थापक र ८५ व्यक्तिगत संस्थापक लगानीकर्ताहरू छन्। कम्पनीको सेयर बिक्री प्रबन्धकमा नबिल इन्भेष्टमेन्ट बैंकिङ रहेको छ।
