प्राइम बैंकले प्राध्यापक डाक्टर तारा (तारादेवी) चित्रकारलाई स्वतन्त्र सञ्चालक पदमा नियुक्त गर्ने निर्णय गरेको छ।
बैंकको मंसिर २९ गते बसेको सञ्चालक समितिको ४५५ औं बैठकले बैंक तथा वित्तीय संस्था सम्वन्धी ऐन, २०७३ बमोजिम चित्रकारलाई नियुक्त गर्ने निर्णय गरेको हो।
नेपाल विद्याभूषण 'क' बाट विभूषित, व्यवस्थापन विषय अन्तर्गत उत्पादनमूलक प्रतिष्ठानको सन्दर्भमा नेपालमा निजीकरणको समीक्षा विषयमा विद्यावारिधि गरेकी प्रा.डा. चित्रकार त्रिभुवन विश्वविद्यालय अन्तर्गत पब्लिक युथ क्याम्पसमा लामो समयदेखि व्यवस्थापन संकायमा रही बैंक तथा वित्तीय क्षेत्र, स्टक बजार, लेखा, विषयमा प्राध्यापन गरिरहेकी थिइन्।
उनका विभिन्न शोधमूलक लेख तथा रचना प्रकाशित छन् भने सामाजिक क्षेत्रमा समेत सक्रिय छिन्।
त्यस्तै बैंकले लाभांश पनि प्रस्ताव गरेको छ। बैठकले आर्थिक वर्ष २०७८/७९ को बैंकको मुनाफाबाट १ अर्ब ६६ करोड ९७ लाख ४० हजार ८९१ रूपैयाँ (प्रति शेयर ८.९५ प्रतिशतका दरले) लाभांश (करसहित) वितरण गर्ने निर्णय गरेको हो।
यसमध्ये प्रति शेयर ४ प्रतिशतका दरले बोनस सेयर र प्रति शेयर ४.९५ प्रतिशतका दरले नगद लाभांश दिने प्रस्ताव गरिएको छ।
प्रस्तावित बोनस सेयर र नगद लाभांश नेपाल राष्ट्र बैंकबाट स्वीकृति र बैंकको वार्षिक साधारण सभाबाट पारित भएपछि प्रदान गरिने बैंकले जनाएको छ।
