केही वर्षदेखि निक्षेपको वृद्धिदरको तुलनामा कर्जाको वृद्धिदर उच्च हुँदै आएको छ।
गत वर्षको अन्त्यसम्ममा बैंकहरूको निक्षेप संकलनको वृद्धिदर नौ प्रतिशत रहँदा कर्जा लगानीको वृद्धिदर १३.१ प्रतिशतको वृद्धि देखिएको थियो।
अहिले भने यस्तो वृद्धिदर सन्तुलन हुने क्रममा गइरहेको जस्तो देखिएको छ।
गत साउनदेखि मंसिरसम्ममा वाणिज्य बैंकहरूको निक्षेपमा ३.१८ प्रतिशतले वृद्धि हुँदा कर्जा लगानी भने १.४१ प्रतिशतले मात्रै वृद्धि भएको छ।
साउन पहिलो साता ४४ खर्ब ७८ अर्ब रूपैयाँ निक्षेप रहेकोमा मंसिर अन्त्यमा ४६ खर्ब २१ अर्ब रूपैयाँ पुगेको छ।
त्यस्तै, साउन पहिलो साता ४१ खर्ब ६५ अर्ब कर्जा लगानी रहेकोमा मंसिर अन्त्यमा ४२ खर्ब २४ अर्ब मात्रै लगानी छ।
कात्तिक अन्त्यको तुलनामा भने मंसिरमा ५७ अर्बले निक्षेप बढेको हो भने कर्जा लगानी मात्रै दुई अर्ब रूपैयाँले बढेको छ।
असार अन्त्ययता भने एनसिसी बैंकको निक्षेप सबैभन्दा धेरै १५ अर्ब ५२ करोडले घटेको छ भने राष्ट्रिय वाणिज्य बैंकको सबैभन्दा धेरै २० अर्ब ५१ करोडले बढेको छ।
कात्तिक अन्त्यको तुलनामा मंसिर महिनामा भने कुमारी बैंकको निक्षेप सबैभन्दा धेरै एक अर्ब ४६ करोडले घट्यो भने राष्ट्रिय वाणिज्य बैंकको सबैभन्दा धेरै १० अर्बले निक्षेप बढेको छ।
असार अन्त्ययता भने एनसिसी बैंकको कर्जा लगानी सबैभन्दा धेरै नौं अर्ब आठ करोडले घटेको छ भने नबिल बैंकको सबैभन्दा धेरै १० अर्बले बढेको छ।
कात्तिक अन्त्यको तुलनामा मंसिर महिनामा भने एनआइसी एशिया बैंकको कर्जा लगानी सबैभन्दा धेरै दुई अर्ब ९९ करोडले घट्यो भने स्ट्याण्डर्ड चार्टर्ड बैंकको सबैभन्दा धेरै एक अर्ब ९४ करोडले कर्जा लगानी बढ्यो।
