नेपाल राष्ट्र बैंकले बैंक तथा वित्तीय संस्थाबाट ऋण लिने ऋणीलाई बैंकका सर्तहरू बुझेर मात्रै ऋण लिन आग्रह गरेको छ।
बैंकले लिने सेवा शुल्क तथा ब्याजदरहरूमा अहिले ऋणहरूको गुनासो बढ्न थालेपछि राष्ट्र बैंकले यस्तो आग्रह गरेको हो।
केन्द्रीय बैंकले मंगलबार एक सूचना जारी गर्दै ब्याजदर निर्धारण र ब्याजदर परिवर्तन हुने सर्त बुझेर कर्जाको उपयोग गर्न भनेको छ। ब्याज र आम्दानीमा तालमेल नभएमा कर्जा भुक्तानीमा समस्या आउन सक्नेमा सचेत गराइएको छ।
निश्चित आय भएका व्यक्तिले परिवर्तनशील ब्याजदरमा कर्जा उपयोग गर्दा आम्दानी र खर्चबीच सामञ्जस्यता हुन नसक्ने र कर्जा भुक्तानीमा समस्या हुने बैंकले जनाएको छ।
'स्थिर ब्याजदरमा कर्जा उपयोग गर्दा ब्याज रकम बढ्दैन। निर्धारित अवधिमै कर्जा भुक्तानी गर्न सकिन्छ र यसले निश्चित आय भएका व्यक्तिको वित्तीय अवस्थामा नकारात्मक असर पर्न दिँदैन,' राष्ट्र बैंकले जारी गरेको सूचनामा उल्लेख छ।
