सबै एससिटी कार्ड हटाएर ‘युनियन पे कार्ड’ ल्याइँदै, शुल्क दोब्बरले बढ्ने

कमल नेपाल

काठमाडौं, असार १४

बैंक तथा वित्तीय संस्थाका सम्पूर्ण 'एससिटी कार्ड' विस्थापन गरिने भएको छ।

आगामी असार १७ (जुलाई १) शनिबारदेखि एससिटी कार्ड विस्थापनको काम सुरु हुने एससिटी नेटवर्कले जनाएको छ।

एससिटीको सट्टा अब 'एससिटी युनियन पे कार्ड' वितरण गरिने छ। सुरुमा तीन वाणिज्य र एउटा विकास बैंकमार्फत यी कार्ड वितरण गरिने भएको छ।

हाल भएका कार्डमा सेक्युरिटी फिचर (इएमभी चिप) नभएकाले यी कार्ड विस्थापन गरेर एससिटी युनियन पे कार्ड संचालनमा ल्याइने भएको हो।

एससिटी नेटवर्कका चिफ बिजनेस अफिसर प्रणयराज भण्डारीका अनुसार नयाँ कार्डमा इएमभी चिप हुने भएकाले बढी सुरक्षित हुनेछ। 'इएमभी चिपका कारण यो धेरै सुरक्षित हुनेछ, अहिलेका कार्डमा इएमभी चिप छैन' सेतोपाटीसँग उनले भने।

एससिटी नेटवर्कमै युनियन पे इन्टरनेसनलको सहकार्यमा नयाँ कार्ड संचालन हुने भएकाले संयुक्तरुपमा ‘एससिटी युनियन पे कार्ड’ नाम राखिएको राजभण्डारीले बताए।

नेपालमा एससिटी नेटवर्कबाटै यी कार्ड संचालनमा आउनेछन् भने अन्य देशमा युनियन पे नेटवर्कमार्फत संचालन हुनेछ। ‘नयाँ कार्ड विश्वभरी चल्ने छन्। फरक यत्ति हो कि नेपालमा एससिटी नेटवर्कले काम गर्नेछ भने बाहिर युनियन पे नेटवर्कले’ उनले भने।

युनियन पे इन्टरनेसनल चीनको मुख्य कम्पनी हो। चीनमा ‘चाइनिज पे इन्टरनेसनल’बाट परिचित कम्पनीको अन्य देशमा ‘युनियन पे इन्टरनेसनल’को नाममा नेटवर्क संचालन भइरहेको छ। भारतसहित विश्वका डेढ सय बढी देशमा यसको नेटवर्क विस्तार भएको छ।

नयाँ कार्ड बैंकले दिएको सुविधाअनुसारकै भारतका विभिन्न एटिएममा संचालन गर्न सकिने उता आवतजावत गर्ने उपभोक्तालाई सहज हुने भएको छ।

नेपालमा एससिटी सपोर्ट गर्ने एटिएमबाट यी कार्ड प्रयोग गर्न सकिनेछ।

‘नेपालमा एससिटी र बाहिर युनियन नेटवर्कको डिभाइसले होल्डरलाई परिचय गर्नेगरी संकेत राख्नु चुनौतिपूर्ण थियो’ राजभण्डारीले भने ‘जे होस् सबै तयारी पूरा गरेर अब नयाँ कार्ड जारी गर्ने तयारीमा छौँ।’

हाल विभिन्न बैंक तथा वित्तीय संस्थाका ग्राहकसँग साढे १० लाखको हाराहारीमा एससिटी कार्ड रहेको अनुमान छ। यी सबै कार्डलाई विस्थापन गरेर नयाँ दिन १ वर्षभन्दा बढी लाग्ने एससिटीको अनुमान छ।

‘नयाँ मेसिनबाट प्रतिघन्टा ३ सय कार्ड बनाउने क्षमता रहेकाले सम्पूर्ण कार्ड विस्थापन गर्न एक वर्षभन्दा बढी समय लाग्न सक्छ’ उनले भने।

शुल्क पहिलेको भन्दा दोब्बर हुने

हाल कायम भएको एससिटी कार्डभन्दा नयाँलाई केही महँगो पर्ने भएको छ। लागत नै महँगो पर्ने भएकाले ग्राहकलाई भार थपिने भएको हो। इएमभी चिपका लागि लागत बढेकाले अहिलेको भन्दा दोब्बर लागत पर्ने राजभण्डारीले जानकारी दिए।

‘बैंकहरुलाई नै प्रतिकार्ड २ सयदेखि साढे २ सय रुपैयाँसम्म पर्न जान्छ’ उनले भने ‘कार्ड संख्याका आधारमा यसको मूल्य तय हुन्छ।’ हाल बैंकहरुलाई एउटा कार्डवापत एक सय रुपैयाँ शुल्क पर्ने गरेको उनले जानकारी दिए।

के हो इएमभी चिप

यो विभिन्न नेटवर्क कम्पनी एसोसिएसनको पहलमा थपिएको सुरक्षा फिचर हो। कार्डमा हुने सुनौलो रंगको चारपाटे आकार नै इएमभी चिप हो।

इएमभीको पूरा रुप यूरोपे मास्टरकार्ड भिजा हो। यो चिपले सम्बन्धित व्यक्तिलाई परिचित गराउने भएकाले धेरै सुरक्षित मानिन्छ। इएमभी चिपयुक्त कार्डलाई डुप्लिकेट बनाएर पैसा निकाल्न मिल्दैन। तर हाल संचालनमा रहेका एससिटी कार्डमा चिप नभएकाले डुप्लिकेट बनाएर पैसा निकालेर ठगी गर्ने काम भएका विगतका थुप्रै घटनाले देखाउँछ।

प्रकाशित मिति: बुधबार, असार १४, २०७४ १५:२५

सिफारिस