मकवानपुरको हेटौंडादेखि काठमाडौं जाने सडकको करिब २० किलोमिटर खण्डको निर्माण सुरू भएको छ।
बागमती प्रदेशको भौतिक पूर्वाधार विकास मन्त्रालय अन्तर्गतको प्रदेशको राजधानी पूर्वाधार विकास विशेष आयोजनाले दुई खण्डमा गरेर ठेक्कामार्फत सडक निर्माण सुरू गरेको जनाएको छ।
आयोजनाका अनुसार हेटौंडादेखि काठमाडौंबीचको कुलेखानी–सिस्नेरी–छैमले–दक्षिणकाली सडकलाई दुई खण्ड गरेर २०.१५ किलोमिटर सडक करिब ७५ करोड रूपैयाँ लागतमा निर्माण भइरहेको हो।
आयोजनाले छुट्याएको मकवानपुर सडकखण्डको १२.१५ किलोमिटर भागअन्तर्गत इन्द्रसरोवर गाउँपालिकाको ज्यामिरेदेखि निर्माण तीव्र भइरहेको आयोजनाका इन्जिनियर किरण रन्जितले जानकारी दिए।
मकवानपुर सडकखण्डमा ४३ करोड ४१ लाख १६ हजार रूपैयाँ लागतमा रमण पिआर त्रिवेणी जेभी मूलपानी काठमाडौंले काम सुरू गरेको हो। यो सडकखण्ड २०८१ साल भदौ २४ गते सक्नेगरी सम्झौता गरिएको इन्जिनियर रन्जितले जानकारी दिए।
यसैगरी काठमाडौं सडकखण्डको ८ किलोमिटर भागमा ३१ करोड ९३ लाख ११ हजार रूपैयाँको लागतमा रौता रामसागर जेभी काठमाडौंले काम गरिरहेको छ। यो कम्पनीसँग २०८० असार १० गतेसम्म सक्नेगरी सम्झौता भएको आयोजनाले जानकारी दिएको छ।
हाल दुवै खण्डमा कटिङ गर्ने, नाली र पर्खाल बनाउने, पिच गर्ने तथा दस मिटर बाटो फराकिलो पार्ने लगायत काम भइरहेको छ। कुल ८५ किलोमिटरको हेटौंडा-काठमाडौं सडकमा हाल साना सवारी साधन मात्र गुडिरहेका छन्। अब सडक निर्माण भएमा ठूला सवारी साधन पनि राम्रोसँग आउन र जान सक्ने बताइएको छ।
1613370875.jpg)
