युरोपेली संघ (ईयू) को औषधिसम्बन्धी नियामक निकायले सो समूहमा आबद्ध २७ राष्ट्रमा फाइजर–बायोएनटेकले बनाएको कोभिड–१९ विरुद्धको खोप प्रयोग गर्न सिफारिस गरेको छ।
‘युरोपियन मेडिसिन्स एजेन्सी’ (ईएमए) ले संयुक्त राज्य अमेरिका र बेलायतमा प्रयोगमा आइसकेको फाइजर–बायोएनटेकद्वारा निर्मित खोप ईयूका ४४ करोड ६० लाख बासिन्दामा प्रयोग गर्न सशर्त सिफारिस गरेको केही घण्टाभित्र नै युरोपेली आयोगले त्यसलाई औपचारिक रूपमा अनुमोदन गरेको छ।
ईएमएकी कार्यकारी निर्देशक इमा कुकले भनिन्, 'धेरैका लागि पीडा र कठिनाइ निम्त्याएको कोरोना भाइरस महामारी विरुद्धको लडाइँमा खोपको प्रयोग आवश्यक भएको र यसका लागि फाइजर–बायोएनटेकद्वारा निर्मित खोपलाई प्रयोग गर्न सिफारिस गरिएको छ। यो एउटा महत्वपूर्ण खुड्किलो हो।'
उनले भनिन्, 'हाम्रो बृहत् मूल्याङ्कनको अर्थ हामी ईयूका नागरिकहरूलाई यो खोपको सुरक्षा र प्रभावकारिताबारे ढुक्क भएर आश्वस्त तुल्याउन सक्छौँ र खोपले आवश्यक मापदण्डहरू पनि पूरा गरेको छ। यद्यपि हामीले हाम्रो कामलाई यहीँ रोक्नेछैनौँ। ईयूमा यो खोप लिने मानिसहरूको सुरक्षाका लागि हामीले खोपको सुरक्षा र प्रभावकारितासम्बन्धी विवरणहरू सङ्कलन तथा तिनको विश्लेषण गर्ने काम हामीले गरिरहनेछौँ।'
खोपको प्रयोगका लागि स्वीकृति पाएसँगै ईयूका केही सदस्य राष्ट्रहरूमा अर्को आइतबारदेखि फाइजर–बायोएनटेकले बनाएको खोप वितरण गर्ने सम्बन्धित मुलुकका सरकारी अधिकारीले बताएका छन्।
यसका लागि जर्मनीले थुप्रै खोप केन्द्रहरू खडा गरिसकेको र शुरूमा जोखिममा रहेका नागरिकलाई आइतबार खोपको पहिलो मात्रा दिने अपेक्षा गरिएको छ।
खोप विकास गरेको कम्पनी र विज्ञहरूका अनुसार कोरोनाभाइरस विरुद्धको यो खोपको दुई मात्रा लिनुपर्छ। पहिलो मात्रा लिएपछि रोगप्रतिरोधी क्षमता विकास हुन सुरू हुन्छ तर दोस्रो मात्रा दिइएको सात दिनपछि मात्र त्यसले पूर्ण प्रभाव देखाउँछ।
ईयूका सदस्य राष्ट्रहरूमा अहिलेसम्म कोभिड–१९ सङ्क्रमित तीन लाख ११ हजार व्यक्तिको मृत्यु भइसकेको छ।
क्रिसमस र नयाँ वर्ष २०२१ को बिदाका बेला हुने मानिसहरूको जमघटलाई लिएर सङ्क्रमण थप फैलिन सक्ने त्रास बढेको भन्दै यूरोपका अधिकांश मुलुकले नियन्त्रणका उपायहरूलाई पुनः सक्रिय बनाइएको छ। जर्मनी र नेदरल्यान्ड्सलगायतका मुलुकले आंशिक लकडाउन नै गरिसकेका छन्।
