हुम्लाको मध्य भेगमा रहेको सर्केगाड गाउँपालिकाबाट ढुवानी हुँदै आएको चामल सिमकोट विमानस्थलमा थन्किएको छ।
विमानस्थलबाट खाद्यान्नको गोदामसम्म ढुवानी गर्ने व्यवस्था हुन नसकेपछि ठूलो परिमाणमा खाद्यान्न विमानस्थलमै थन्किएको हो।
खाद्य व्यवस्था तथा व्यापार लिमिटेड शाखा हुम्लाका अनुसार विमानस्थलबाट लिमिटेडको गोदामसम्म ट्याक्टरमा ढुवानी गर्ने बाटो बन्द भएको छ। यसअघि टिपरमार्फत् चङ्खेली गाउँपालिकाको सरिसल्ला हुँदै सर्केगाड गाउँपालिकाको सर्केगाड बजारसम्म पुर्याइएको खाद्यान्न हेलिकप्टरमार्फत् सिमकोटसम्म ढुवानी गरिँदै आएको थियो।
यसअघि विमानस्थलबाट ट्याक्टरले गोदामसम्म खाद्यान्न ढुवानी गर्ने गरेको थियो। अहिले खाद्यान्न ढुवानी गर्ने सिमकोटस्थित तल्लो बजारको महिला छात्रावास क्षेत्रमा सडक मर्मत भइरहेको हुँदा ढुवानी हुन नसकेको लिमिटेड शाखा हुम्लाले जनाएको छ। सडक नबनेसम्म खाद्यान्न विमानस्थलमै थन्किने छ। हाल सिमकोट विमानस्थलमा ५२९ क्विन्टल खाद्यान्न रोकिएको छ। सडक बन्न अझै एक साता बढी लाग्ने बताइएको छ।
