काठमाडौं विश्वविद्यालय (केयू)ले भारतका प्रतिष्ठित शैक्षिक संस्थाहरू इन्डियन इन्स्टिच्युट अफ टेक्नोलोजी-हैदराबाद (आइआइटिएच) र इन्टरनेसनल इन्स्टिच्युट अफ इन्फर्मेसन टेक्नोलोजी-हैदराबादसँग मिलेर संयुक्त डिग्री कार्यक्रम सञ्चालन गर्ने भएको छ।
यस सम्बन्धमा केयू र आइआइटिएच, आइआइआइटिएचबीच समझदारी र सम्झौताहरू भएको छ। काठमाडौं विश्वविद्यालय तथा नेपालको स्वास्थ्य सेवाको आवश्यकता परिपूर्ति गर्न आगामी शैक्षिक सत्रदेखि नै संयुक्त डिग्री कार्यक्रमहरू सुरु हुने समझदारी तथा सम्झौता पत्रमा हस्ताक्षर गर्न आयोजित कार्यक्रममा काठमाडौं विश्वविद्यालयका उपकुलपति प्राध्यापक भोला थापाले जानकारी दिए।
यसअन्तर्गत सञ्चालन हुने हेल्थ केयर टेक्नोलोजीको शैक्षिक कार्यक्रमहरूमा दुवै शैक्षिक संस्थाका प्राध्यापकबाट आधा-आधा प्राध्यापन हुने, विद्यार्थी तथा भौतिक र वित्तीय स्रोतको आदानप्रदान हुने बताइएको छ।
इन्जिनियरिङको क्षेत्रमा पनि संयुक्त डिग्री कार्यक्रम सञ्चालन हुने बताइएको छ। यसबाट दक्षिण एसिया क्षेत्रको लागि आवश्यक पर्ने सक्षम जनशक्ति उत्पादनमा सघाउ पुग्ने प्राध्यापक थापाले बताए।
स्वास्थ्य विज्ञानतर्फको शैक्षिक कार्यक्रम सुरूमा चितवनको भरतपुरस्थित पुरानाने मेडिकल कलेज (कलेज अफ मेडिकल साइन्सेज)को हेल्थकेयर टेक्नोलोजी इन्नोभेसन सेन्टर (एचटिआइसी)मा हुने बताइएको छ। एचटिआइसी अत्याधुनिक शैक्षिक तथा अनुसन्धान केन्द्र हुने र त्यसले नयाँ प्रविधि समेट्दै स्वास्थ्य क्षेत्रको अनुसन्धान अघि बढाउनेछ। यसबाहेक इन्कुबेशन र विकसित उत्पादनको बजारीकरणमा पनि सहजीकरण गर्नेछ।
एचटिआइसीले स्नातकोत्तरको शैक्षिक कार्यक्रम र पिएचडीको शोध कार्यक्रम पनि सञ्चालन गर्नेछ। स्नातकोत्तर कार्यक्रम र पिएचडी शोध चारपक्षीय संकायबाट सञ्चालन हुनेछ। विद्यार्थीले सुरूका ६ महिना कलेज अफ मेडिकल साइन्समा अध्ययन-अनुसन्धानको काम गरेपछि उपयुक्तता अनुसार ६ महिनाका लागि अध्ययन-अनुसन्धान गर्न आइआइआइटिएच वा आइआइटिएच पठाइनेछ।
त्यसपछि आवश्यकता अनुसार विद्यार्थीलाई ३ देखि ६ महिना एसओई पठाइनेछ। त्यसपछिका बाँकी अवधि उनीहरूले कलेज अफ मेडिकल साइन्स फर्केर आफ्नो अध्ययन अनुसन्धान पूरा गर्नेछन्।
सम्झौता अनुसार त्यस्ता विद्यार्थीको शैक्षिक प्रमाणपत्रमा चारवटै संस्थाको दस्तखत र छाप हुनेछ। एचआइटिसीले स्नातकोत्तर र पिएचडीका लागि आधारको भूमिका खेल्ने बताइएको छ।
समझदारी तथा सम्झौता हस्ताक्षर कार्यक्रममा सहभागी अर्थमन्त्री जनार्दन शर्माले गुणस्तरीय प्राविधिक जनशक्ति उत्पादन गर्ने चारवटै संस्थाको पहलप्रति खुशी व्यक्त गर्दै यस्ता कार्यक्रमको लागि सरकारको तर्फबाट उचित सहयोग रहने बताए।
शिक्षामन्त्री देवेन्द्र पौडेलले यस्ता कार्यक्रमबाट स्वदेशमा अझ गुणस्तरीय शिक्षा प्राप्त गर्ने मार्ग प्रशस्त हुने भन्दै सबै पक्षको प्रशंसा गरे।
पुरानो मेडिकल कलेजका सञ्चालक भी नटराज प्रसादले धेरै अघि नै यस्तो शैक्षिक कार्यक्रम सञ्चालन गर्ने तयारीमा आफूहरू रहे पनि कोरोना महामारीका कारण पछि धकेलिएको जानकारी गराए। अब स्वास्थ्य क्षेत्रमा विश्वभर प्रतिस्पर्धा गर्न सक्ने जनशक्ति उत्पादन गर्ने अभियानले गति लिने उनले बताए।
कार्यक्रममा आइआइआई हैदराबादका निर्देशक प्राध्यापक बीएस मूर्तिले सम्झौता र समझदारीअनुसारका शैक्षिक कार्यक्रम कसरी सञ्चालन हुन्छ भन्ने विषयमा आफ्नो धारणा प्रस्तुत गरेका थिए।
