बिहीबारबाट भृकुटीमण्डपमा चेम्बर एक्स्पो हुने भएको छ। नेपाल चेम्बर अफ कमर्सको आयोजनामा 'नेपाल चेम्बर एक्स्पो २०२२' हुने भएको हो।
यो एक्स्पो पाँचौ संस्करण हो। यसमा व्यापारिक अन्तर्क्रिया, आयात निर्यातको सूचना आदान प्रदान तथा नेपाली उत्पादनको बजारीकरणलाई जोड दिइएको छ।
चेम्बर एक्सपोमा अन्तर्राष्ट्रिय व्यापारिक समुदायको प्रत्यक्ष सहभागिताले अन्तर्राष्ट्रिय क्षेत्रमा भइहेका आर्थिक क्रियाकलाप, नविन प्रविधिको प्रयोग एवम् व्यापार व्यवस्थापनका नयाँ आयामहरूलाई नजिकबाट नियाल्न तथा नेपाली उद्योगी व्यवसायीहरूलाई सहयोेग मिल्ने चेम्बरले बताएको छ।
मेलामा गुणस्तरीय सामान प्रयोग गर्न एवम् उपभोक्ता हित सम्बन्धी जनचेतना अभिवृृद्धि गर्ने दायित्वलाई प्रर्दशनीले प्राथमिकता दिने अपेक्षा गरिएको छ। यस्तै, निकासी अभिवृद्धि गर्नेमा पनि चेम्बर मेलाले सहयोग गर्ने विश्वास गरिएको छ।
मेलामा घरेलु तथा स्वदेशी उत्पादनका साथै कृषि एवम् जडिबुटी जन्य वस्तुहरू, विद्युतीय सामान, गार्मेन्ट्स एवम् टेक्स्टायल, छाला जन्य वस्तुहरू, कस्मेटिक, खाद्य तथा दुग्ध जन्य सामाग्रीहरूको प्रर्दशनी एवम् बिक्री गरिने आयोजक चेम्बरले जनाएको छ।
उद्योग वाणिज्य तथा आपूर्ति मन्त्रालय एवम् व्यापार तथा निकासी प्रर्वद्धन केन्द्रको सहकार्यमा आयोजित अन्तर्राष्ट्रिय मेलामा बंगलादेश पार्टनर कन्ट्रीको रुपमा रहेको छ। मेलामा नेपाल, भारत, पाकिस्तान लगायत अन्य राष्ट्रका उद्योगी व्यवसायी समेत गरी १ सय ५० भन्दा बढी स्टलहरू रहेका छन्।
कोभिड-१९ बाट शिथिल अर्थतन्त्रलाई क्रियाशील बनाउने उद्देश्यले विभिन्न राष्ट्रको सहभागितामा अन्तर्राष्ट्रिय एक्स्पो आयोजना गरिएको चेम्बरका अध्यक्ष राजेन्द्र मल्लले बताए । ‘बिगत वर्षहरूमा कोरोना महामारीका कारण चेम्बरबाट आयोजना गरिने एक्स्पो स्थगित भएको थियो। अहिले पाँचौ संस्करण मेला आयोजना गरिएको छ,’ उनले भने।
अन्तर्राष्ट्रिय मेलाले नेपाली उत्पादनको बजारीकरण गर्न तथा अन्तर्राष्ट्रिय व्यापारिक समुदायलाई सहभागी गराई गतिशील आर्थिक वातावरण निर्माण गर्ने मुख्य उद्देश्य रेहेको मल्लको भनाई छ।
कोभिड-१९ संक्रमण जोखिमका कारण अघिल्ला दुई संस्करण भने रोकिएको थियो। संक्रमण जोखिम कम भएसँगै आर्थिक गतिविधिलाई चलायमान बनाउन र स्वदेशी उत्पादनहरूको प्रर्वद्धन गर्न चेम्बरले पाँचौ अन्तर्राष्ट्रिय एक्स्पो गर्न लागेको हो।
