द ब्रिटिस कलेजले 'तेस्रो द ब्रिटिस कप २०२२' इन्टर कलेज फुटसल प्रतियोगिता आयोजना गर्ने भएको छ।
आगामी अगस्ट ४ देखि ५ सम्म बालुवाटारस्थित ढुकु फुटसलमा उक्त प्रतियोगिता आयोजना हुने भएको हो।
पहिलो र दोस्रो द ब्रिटिस कप क्रमशः सन् २०१८ र २०१९ मा भएको थियो। तर, त्यसपछि लगातार दुई वर्ष कोरोना महामारीका कारण उक्त प्रतियोगिता हुन नसकेको बताइएको छ।
तर, यो प्रतियोगितालाई थप रोमाञ्चक बनाउने रणनीतिका साथ पुनः तयारी गरिएको कलेजले जनाएको छ। उक्त प्रतियोगितामा १३ कलेजहरुबीच प्रतिस्पर्धा हुनेछ।
ब्रिटिस कलेजसहित लिटल एन्जल्स, सफ्टोरिका, प्राइम, एपेक्स, आइआइएमएस, सिल्भर माउन्टेन, पिसिपीएस कलेज, एस इन्टरनेशनल, थेम्स कलेज, क्याम्पियन कलेज, कुसोम, द ब्रिटिस प्रोफेसनल कलेजले प्रतियोगितामा भाग लिदैछन्।
विजयी टिमले एक लाख रुपैयाँ नगद पुरस्कार पाउने आयोजकले बताएको छ।
त्यस्तै, पहिलो रनर अपले ५० हजार रुपैयाँ, उत्कृष्ट खेलाडी र उत्कृष्ट गोलरक्षकले नगद दश हजार रुपैयाँ पाउने कलेजले जानकारी दिएको छ।
