सफ्टवेरिका कलेजले आयोजना गर्न लागेको 'क्याप्चर द फ्लाग' प्रतियोगिताको लागि रजिस्ट्रेसन फर्म खुलेको छ।
यही सेप्टेम्बर ३ मा आयोजना हुने उक्त प्रतियोगितामा कुनै पनि कलेजको आइटी विषयमा स्नातक गरेका विद्यार्थीहरू सहभागी हुन सक्नेछन्।
सहभागी हुन इच्छुक विद्यार्थीहरूले अनलाइन वा कलेजमै गएर फर्म भर्न सकिने व्यवस्था गरिएको कलेजका प्रमुख प्रमोद पौडेलले बताए।
उनका अनुसार प्रतियोगितामा सहभागी हुनका लागि प्रत्येक समूहमा कम्तीमा तीन जनादेखि पाँच जनासम्म विद्यार्थी हुनुपर्ने छ।
प्रतियोगितामा सहभागीहरू सबैले आफ्नै ल्यापटप ल्याउनु पर्ने र सहभागी हुँदा सरकारी वा कलेजबाट दिएको आइडिकार्ड अनिवार्य ल्याउनुपर्ने बताइएको छ।
यस्तै, स्नातक तहको अध्ययन पूरा नगरेको वा सोभन्दा कमको अध्ययन मात्र गरेका विद्यार्थीहरू सहभागी हुन नपाउने तर इभेन्टमा आउन पाउने पौडेलले जानकारी दिए।
प्रतियोगितामा सहभागीमध्ये प्रथमले २५ हजार, दोस्रोले १५ हजार र तेस्रोले १० हजार रुपैयाँ पुरस्कार पाउनेछन्।
उक्त फर्म यही अगस्ट २४ तारिखसम्म भर्न सकिने बताइएको छ।
