आर्थर गन नामले परिचित गायक दिवेश पोखरेलले 'टुबोर्ग होमकमिङ टुर' शनिबार राति दरबारमार्गको क्लब प्लाटिनमबाट सुरू गरेका छन्।
उनले उल्लेख्य संख्यामा उपस्थित दर्शकमाझ चर्चित गीतहरू गाएर उक्त टुरको सुरूवात गरेका हुन्।
कार्यक्रमको सुरुवात उनले ‘के पीर पयो तिमीलाई’ गीतबाट थाले । ‘लभ इज माई रिडेम्पसन’ र ‘न्यानो घर’ जस्ता उनका लोकप्रिय गीतले दर्शकको निकै ताली पाए ।
दर्शकले आर्थरका नेपाली र अंग्रेजी गीतको मजा लिए ।
उनले अब पोखरा, चितवन, बुटवल, धरान, बिर्तामोड लगायतका शहरमा प्रत्यक्ष प्रस्तुति दिने कार्यक्रम रहेको छ ।
सन् २०२० मा अमेरिकी गायन रियालिटी शो अमेरिकन आइडल १८ औं सिजनको एक हिस्सा बनेपछि आर्थर गनको लोकप्रियता निकै बढ्यो ।
धेरैले उनलाई त्यही प्लेटफार्मका प्रतिभाशाली सहभागीका रूपमा चिनेका छन् ।
उक्त सिजनको उपविजेता भएका आर्थरको भिन्न प्रकारको स्वरलाई धेरै कलाकारले प्रशंसा गरेका छन् ।
होम कमिङ टुरमा यसपटक उनलाई टुबोर्गले ल्याएको हो। नेपाली संगीत जगत्सँग हातेमालो गर्दै आएको टुबोर्गले आर्थर गनलाई ल्याउन पाउँदा खुसी लागेको गोर्खा ब्रुअरीका मार्केटिङ डाइरेक्टर आशिष विष्टले बताए।
