सरकारले १३ औं दक्षिण एसियाली क्षेत्रीय खेलकुद प्रतियोगिता (साग)लाई ऐतिहासिक, भव्य र सभ्य बनाउन कुनै कसर बाँकी नराख्ने अठोट व्यक्त गरेको छ।
काठमाडौं, पोखरा र जनकपुरमा मंसिर १५ देखि २४ गतेसम्म हुने उक्त प्रतियोगिताको राष्ट्रपति विद्यादेवी भण्डारीले आगामी आइतबार दशरथ रंगशालामा एक विशेष समारोहबीच उद्घाटन गर्नेछिन्।
नेपालको इज्जत, प्रतिष्ठा र खेलक्षेत्रको गौरवमाथि उठाउने हिसाबले प्रतियोगितालाई ऐतिहासिक, भव्य र सभ्य तुल्याउन कुनै कसर बाँकी नराख्ने युवा तथा खेलकुदमन्त्री जगतबहादुर विश्वकर्माले जानकारी दिए।
करिब सवा तीन घण्टाको उद्घाटन सत्रमा सहभागी मुलुकका खेलाडीको मार्च पासका अतिरिक्त नेपालको इतिहास, वर्तमान र भविष्यको मार्गनिर्देश गर्ने सन्देशसहितको विविध सांस्कृतिक कार्यक्रम प्रस्तुत हुने छ। उद्घाटन समारोहमा १५ हजार भन्दा बढी दर्शकको सहभागिता रहनेछ।
.JPG)
प्रतियोगितामा भाग लिन भारत, बङ्गलादेश, पाकिस्तान, माल्दिभ्स, भुटान, श्रीलंकाका करिब पाँच हजार सङ्ख्यामा खेलाडी, प्रशिक्षक र अफिसियल कर्मचारी आउने क्रम सुरू भइसकेको छ। उनीहरूको बसोबासका लागि राजधानीमा मात्रै सय को संख्यामा होटल बुकिङ भइसकेको तयारी समितिका संयोजक रिमबहादुर रानाभाटले जानकारी दिए।
सागलाई सफल तुल्याउन करिब २० हजार सुरक्षाकर्मी खट्नेछन् भने ५०० स्वयंसेवकलाई प्रशिक्षण दिइसकेको राष्ट्रिय खेलकुद परिषद्ले जनाएको छ।
सन् १९८४ मा स्थापना भएको सागको १३ औं शृङ्खलासम्म आइपुग्दा नेपालले यसअघि दुई वटा प्रतियोगिता सफलतापूर्वक सम्पन्न गरिसकेको छ। मन्त्री विश्वकर्माले भने, ‘साग खेलकुद प्रतियोगिता हाम्रा लागि आफैंमा महत्वपूर्ण उत्साहको पर्व हो, प्रतियोगितालाई भव्यरूपमा सफल तुल्याउन सबैको साथ सहयोगका लागि अपिल गर्दछौं।’
.JPG)
प्रतियोगिता भव्यरूपमा आयोजना गर्न दशरथ रंगशालाको पुनर्निर्माण काम पूरा भएको छ। पोखराको रंगशालाको काम पनि अन्तिमरूपमा पुगेको छ। प्रतियोगितामा समावेश २६ खेलमध्ये महिला फुटबल, ब्याड्मिन्टन, आर्चरी, भारत्तोलन, बिच भलिबल, ट्रायथलन, हैण्डबल पोखरामा हुने छ।
ऐतिहासिक नगरी जनकपुरमा भने कुस्ती हुनेछ। नेपालले प्रतियोगितामा भाग लिने १९ विधाका खेलाडीलाई विदेशमा प्रशिक्षणमा पठाएको थियो भने सात खेल विधाका प्रशिक्षकलाई नेपालमा बोलाएर खेलाडीलाई प्रशिक्षित तुल्याइएको परिषद्का सदस्य सचिव रमेश सिलवालले बताए।
देशभर सागसम्बन्धी प्रतियोगिताको प्रचारप्रसार र खेलकुदको माहोल बनाउने क्रममा मुलुकका सातै प्रदेशमा यसअघि नै १३ औं सागको ओलम्पिक टर्च पुर्याइसकिएको छ। कीर्तिमानी खेलाडी बैकुण्ठ मानन्धर, दीपक विष्ट, राजेन्द्र भण्डारी, सीता राई, सङ्गीना वैद्य, नयना शाक्य, जीतबहादुर केसी, सविता राजभण्डारी, विधान लामालगायतका खेलाडीले खेलकुदको माध्यमबाट नेपाल र नेपालीको प्रतिष्ठा र गौरव बढाउन महत्वपूर्ण योगदान दिए।
.JPG)
प्रतियोगिता अन्तर्गत भलिबल प्रतियोगिता भने बुधबारबाट सुरूआत भइसकेको छ। यस प्रतियोगितामा सातै देशका खेलाडीले भाग लिएको एउटै विधा भनेको ब्याड्मिन्टन हो। सरकारले प्रतियोगितामा उत्कृष्ट नतिजा हासिल गर्ने खेलाडीलाई प्रदान गर्दै आएको पुरस्कार राशीमा उल्लेख्य वृद्धि गर्ने यसअघि नै घोषणा गरिसकेको छ। १३ औं सागका लागि ३१७ स्वर्ण पदक, सोही सङ्ख्यामा रजत सोही सङ्ख्यामा रजत र ४८१ वटा कास्य पदक कायम गरिएको छ। प्रतियोगिता अन्तर्गत सबभन्दा बढी प्रतिस्पर्धा पौडी विधामा ३८ वटा स्वर्ण पदक प्रदान गरिने छ।
प्रतियोगितामा ५९४ खेलाडीसहित ७८० जनाको नेपाली टोलीको सहभागिता रहनेछ। प्रतियोगिताको प्रत्यक्ष प्रसारण नेपाल टेलिभिजनबाट हुने छ। दक्षिण एसियाली मुलुकसहित विश्वका १५ भन्दा बढी मुलुकबाट प्रत्यक्ष प्रसारण हेर्न सकिने व्यवस्था मिलाइएको बताइएको छ।
सरकारले सन् २०२० का लागि घोषणा गरेको नेपाल भ्रमण वर्षको रणनीतिक तयारी योजनासँग जोडेर यो पटकको सागको तयारी गरेको छ।
दक्षिण एसियाली मुलुकबाट प्रतियोगितामा भाग लिन आउने खेलाडी, प्रशिक्षक, दर्शक, अफिसियललगायतका पाहुनाको स्वागत गर्ने क्रममा नेपालको रहनसहन, भेषभूषासहित साँस्कृतिक कार्यक्रम प्रस्तुत गरिने छ। काठमाडौँ, पोखरा र जनकपुर पुग्ने पाहुनालाई सो स्थानका सांस्कृतिक सम्पदा, रहनसहन, वेषभूषा, भाषा र संस्कृतिबारेमा जानकारी दिने व्यवस्था मिलाइएको छ। यस्तो कार्यक्रमले भ्रमण वर्ष २०२० वर्षलाई सफल तुल्याउन महत्वपूर्ण आधार तयार गर्ने मन्त्री विश्वकर्मा बताए।
.JPG)
तस्विरहरुः नारायण महर्जन
.JPG)
