कलाकार क्षेत्रलाल कायस्थ प्रतिष्ठान पोखराले कला साधनामा लागेकाहरूलाई प्रोत्साहन पुर्याउने उद्देश्यका साथ ५० हजार राशिको नवीन कलाश्री पुरस्कार शुक्रबार घोषणा गरेको छ।
कलाकार क्षेत्रलाल कायस्थको ७५ औं जन्मदिवसका अवसरमा आयोजित कार्यक्रममा प्रतिष्ठानका अध्यक्ष लोकप्रसाद गुरुङले कलाका क्षेत्रमा विशिष्ट योगदान पुर्याउने एक जनालाई प्रत्येक दुई वर्षमा पुरस्कृत गरिने जानकारी दिए।
उक्त अवसरमा कलाकार कायस्थद्वारा सिर्जना गरिएका कलाको १२ औं एकल चित्रकला प्रदर्शनीको शिक्षाविद् जर्ज जोनले उद्घाटन गर्दै कलाका क्षेत्रमा निरन्तर समर्पित कायस्थको कलाप्रतिको लगाव सबैका लागि अनुकरणीय भएको बताए।
कार्यक्रममा सिर्जनशील कलाकार समूहका अध्यक्ष विश्वराज पराजुली, प्रा डा विश्व श्रेष्ठ, प्रतिष्ठानका सचिव कमल अथक, सहसचिव ज्योति गुरुङ, सदस्य विनोद सुवेदीलगायतले पुरस्कारको स्थापनाले कलाकारहरु थप प्रेरित हुने विश्वास व्यक्त गरे। रासस
