इन्डोनेसियन आमा र नेपाली बुवाकी छोरी आइशा डोटेलले गाएको गीत 'गाडी गुड्छ नेपाली' गत वर्ष धेरैले मन पराएका थिए। यो गीतकी गीतकार प्रगति देवकोटाले आइशाले महिनौं नेपाली उच्चारण सिकाएर गाउन सहयोग गरेकी थिइन्।
विगत १६ वर्षदेखि सिड्नीमा बस्दै आएकी प्रगति १६ वर्षीया गायिका आइशाकी आन्टी हुन्। वेस्टर्न सिड्नी युनिभर्सिटीमा पढाउने प्रगति महाकवि लक्ष्मीप्रसाद देवकोटाकी नातिनी पनि हुन्। उनका हजुरबुवा मधुसुदन देवकोटा र लक्ष्मीप्रसाद देवकोटा दाजुभाइ हुन्।
उनै आइशा र प्रगतिको जोडीले आमा छोरीको सम्बन्धमा आधारित नयाँ गीत सार्वजनिक गरेका छन्। गीतमा आइशालाई गायिका प्रमिला राईले साथ दिएकी छिन्। गीत हो- लिसन टु मी। यो गीतको भिडिओ निर्देशन चर्चित रेडियो प्रस्तोता दीपेश श्रेष्ठले गरेका हुन्। आइशा र प्रगतिजस्तै निर्देशक दीपेश हाल अस्ट्रेलियामा छन्।
भिडिओ निर्देशनसँगै दीपेशले भिडियोको छायांकन तथा सम्पादन गरेका छन्। सञ्जीव सिंहले संगीतबद्ध गरेको गीतको संगीत संयोजन दिनेश श्रेष्ठले गरेका हुन्।
सेतोपाटीका लागि 'गाडी गुड्छ नेपाली' गीतबारे जानकारी दिने क्रममा गीतकार प्रगतिले यसलाई पुरानो र नयाँ पुस्ता जोड्ने प्रयास भनेकी थिइन्।
'लिसन टु मी' गीतमा भने आमा र उनकी किशोरावस्था प्रवेश गरेकी छोरीबीचको सम्बन्धको कथा छ। किशोरी छोरीप्रति आमाको मनमा पलाउने चिन्तालाई गीतमा सरल तरिकाले व्यक्त गरिएको छ। आमा छोरीको दैनिकी समेटिएको यो गीतले विदेशमा बस्ने अभिभावक र सन्तानबीचको सम्बन्ध चित्रण गर्छ।
गीतको सुरुआत नै सबैजसो आमाले किशोरी छोरीसँग गर्ने गुनासोबाट हुन्छ-
बिहान उठ्न सधैं लेट
खाएपछि टेबलमै प्लेट
स्कुल सकी घर आउनु छैन
साथीहरुसँग भेट
तर छोरी भने आफू सधैं राति ढिलासम्म पढ्ने र आफ्नो जिम्मेवारी सही ढंगले गर्छिन्। त्यसैले उनी जवाफमा आमालाई भन्छिन्, 'लिसन टु मी'।
आमा छोरीबीचको गुनासो र असन्तुष्टिसँगै गीतमा उनीहरुबीचको आत्मीय प्रेम देख्न पाइन्छ।अंग्रेजी गीत गाउने आइशालाई नेपाली गीत गाउन प्रेरणा दिने प्रगति नै हुन्। पहिलाको गीतजस्तै यो गीतको भिडिओमा आन्टी-छोरी सँगै देखिएका छन्।
गीतकार देवकोटा भन्छिन्, 'विदेशमा बसेर पनि आफू र नयाँ पुस्तालाई नेपाल र नेपालीसँग जोड्ने प्रयास हो हाम्रो गीत।'
गीतको भिडिओ गत साता प्रगति र आइशाको नाममा संयुक्त रुपमा खोलिएको च्यानलबाट युट्युबमा अपलोड गरिएको हो।
