नेपालस्थित युरोपियन युनियनको डेलिगेसनले लैंगिक समानताबारे लघु-चलचित्र प्रतियोगिता आयोजना गर्ने भएको छ। युरोपियन युनियनले १० औं संस्करणको नेपाल युरोपियन युनियन फिल्म फेस्टिभल (नियुफ) को सहायक कार्यक्रमको रुपमा प्रतियोगिता घोषणा गरेको हो।
यही असोज १ देखि ९ गतेसम्म चल्ने नियुफको १० औं संस्करण भर्चुअल हुनेछ।
प्रतियोगितामा लैंगिक समानताका विषयमा बनेका फिल्म प्रतियोगीका रुपमा सहभागी हुन सक्ने युरोपियन युनियनले उल्लेख गरेको छ। लैंगिक विभेद, लैंगिक समानताका फाइदा, नेपालमा लैंगिक समानताको अवस्था आदि विषय उठाइएका फिल्मलाई प्रतियोगितामा प्राथमिकता दिइने पनि युरोपियन युनियनले जनाएको छ।
लैंगिक समानताका विषयलाई छुने अन्य विषयमा बनाइएका फिल्म पनि प्रतियोगितामा सहभागी हुनसक्ने छन्।प्रतियोगितामा सहभागी हुने फिल्मकर्मी नेपाली नागरिक हुनुपर्ने र फिल्मको लम्बाई ४० मिनेट वा त्योभन्दा कम हुनुपर्ने छ। त्यसबाहेक प्रतियोगितामा सहभागी हुने फिल्म सन् २०१८ वा त्योभन्दा पछि बनाइएको हुनु पर्नेछ। त्यो समयावधिभन्दा अगाडि बनाइएका फिल्म प्रतियोगिताका लागि योग्य नहुने बताइएको छ।
नेपालमा बोलिने जुनसुकै भाषामा बनेका फिल्म प्रतियोगितामा सहभागी हुन सक्ने तर यसरी बनेका फिल्मको अंग्रेजी सबटाइटल भने हुनुपर्ने जनाइएको छ। अंग्रेजीमा पूरै खिचिएको फिल्म छ भने त्यसलाई नेपालीमा सबटाइटल गरेको हुनुपर्ने पनि युरोपियन युनियनले बताएको छ।
प्रतियोगितामा सहभागी हुन चाहाने फिल्मकर्मीले आफ्नो फिल्म एमपी ४ फर्म्याटमा nepal.eufilmfestival@gmail.com भदौ १५ मध्यरातसम्ममा पठाइ सक्नुपर्नेछ। त्योबाहेक फिल्मकर्मीले भिमियो लिंक पनि पठाउन सक्ने छन्।
यसरी सहभागी हुन आएका फिल्मलाई युरोपियन युनियनको नेपालस्थित डेलिगेसनले गठन गरेको निर्णायक समूहले मूल्यांकन गर्नेछ र फेस्टिभलको सुरुवातमै विजेताको घोषणा गरिनेछ। प्रतियोगितामा उत्कृष्ट हुने फिल्मले ५ सय युरो प्राप्त गर्नेछ। यो प्रतियोगितामा उत्कृष्ट बनेको फिल्म नेपाल युरोपियन फिल्म फेस्टिभलको यही संस्करणमा प्रदर्शन पनि गरिनेछ।
