निर्देशक सहारा शर्माको फिल्म ‘एक मुठ्ठी बादल’ भारतको नेसनल फिल्म डेभलपमेन्ट कर्पोरेसन (एनएफडीसी) को-प्रोडक्सन बजारमा छानिएको छ।
गौथली इन्टरटेन्मेन्ट प्रालिद्वारा निर्माण हुने यो फिल्म यही मंसिर ४ देखि ९ सम्म हुने एनएफडीसीको सहनिर्माण बजारका लागि छानिएको छानिएको हो।
एनएफडीसीले बुधबार सार्वजनिक गरेको सूचीमा ११ देशका २० फिल्ममध्ये ‘एक मुठ्ठी बादल’ छानिएको गौथली इन्टरटेनमेन्टले जनाएको छ।
आयोजकका अनुसार, यो दक्षिण एसियाकै सबैभन्दा ठूलो सिनेमा बजार हो। अनलाइन सञ्चालन हुने बजारमा छानिएका फिल्महरूले भारत, एसियाली र युरोपेली मुलुकहरूका लगानीकर्ता, वितरक र स्टुडियोका प्रतिनिधिलाई भेट्ने छन्। छानिएका सिनेमाले युरोपमा रहेका विभिन्न मार्केट, कोष, र प्रदर्शनका लागि पनि अवसर पाउने छन्।
'एक मुठ्ठी बादल केही अप्रत्यासित, दुर्भाग्यपूर्ण घटनापश्चात् एउटी आमा र उनको परिवार वर्षौदेखिको रहस्य र कुन्ठा सामना गर्न बाध्य हुने कथा हो,' निर्देशक साहारा शर्मा भन्छिन्, 'एक रातमा समेटिने यो कथामार्फत् मैले आमा र छोरीहरू बीचको नाता र सम्बन्ध केलाउने प्रयास गरेको छु।
पितृसत्तात्मक समाजमा आमाहरूको पहिचान दानका देवी र त्यागको पराकाष्टामा मात्रै सीमित रह्यो। मैले मेरो फिल्मबाट आमा र छोरीहरूलाई कुनै पनि परिधिभित्र नराखी मानवको रुपमा चित्रण गर्ने प्रयास मात्र गरेको हुँ।'
निर्माता अभिमन्यु दीक्षितले सेतोपाटीलाई भने, 'महामारीले नेपाली सिनेमा क्षेत्रलाई शिथिल बनाएको बेला विदेशमा नेपाली स्वादको फिल्मका लागि लगानी, बजार र प्रदर्शनी खोज्ने प्रयास हो। एनएफडीसी फिल्म बजारमा छनोट भएको खबरले हामीलाई उत्साहित बनाएको छ।'
अभिमन्युका अनुसार फिल्मको लेखन तथा निर्माण चरणमा उनीहरुको आयोजकसँग भेट भएको छैन। कथा बुन्नेदेखि लेखनका काम र निर्माता सँगको छलफलहरू सबै अनलाइनमार्फत भएको हो।
गौँथली ईन्टरटेन्मेन्टद्वारा निर्मित कथानक फिल्म ‘बर्दिया सुन्दरी’ पनि यही बजारको भ्युइङ रुम सेक्सनमा छानिएको थियो।
'बर्दिया सुन्दरी सुटिङ सकाएर फिल्म बजारमा लगेका थियौँ। बनिसकेको फिल्मभन्दा लेखनकै चरणमा बजारमा जाँदा थप लाभदायी हुने देखिएकोले यसपाली भने हामीले प्रि-प्रोडक्सनका बेला आवेदन दिएका थियौं,' उनले भने।
सहारा शर्मा यौनिकता, डिभी चिठ्ठा र डिप्रेसनबारे २०१३ मा सार्वजनिक 'ईन्द्रेणी खोज्दै जाँदा' की निर्देशक हुन्। यो फिल्मले काठमाडौं अन्तर्राष्ट्रिय पर्वतीय चलचित्र महोत्सवमा नेपाल पनोरमा विधामा अवार्ड र टोरन्टो नेपाली फिल्म फेस्टिभलमा क्रिटिक्स अवार्डसमेत जितेको थियो।
नेपालबाट गत साल यही बजारमा निर्देशक पासाङ दावाको ‘कुहिरो पारीको सहर’ छानिएको थियो ।
