निर्देशक मीन भामले आगामी फिल्म 'चिसो वर्ष' (अ इयर अफ कोल्ड) का लागि करिब १ करोड ७ लाख नेपाली नगद बराबरको 'ताइपेइ फिल्म फन्ड' प्राप्त गरेका छन्।
फिल्म निर्माण सहयोगका रुपमा 'ताइपेइ फिल्म कमिसन'बाट दिइने यो फन्ड अक्टोबर २५ मा घोषणा भएको हो।
हरेक वर्ष ४ देखि ६ वटा फिल्मलाई ताइवान सरकारले यो फन्ड प्रदान गर्छ। यस वर्ष नेपाललगायत बंगलादेश, फ्रान्स, मलेसिया र अमेरिका गरी ५ देशका फिल्मले सन् २०२१ को 'ताइपेइ फिल्म फन्ड' पाएका हुन्।
ताइवान सरकारले विदेशी फिल्म उद्योग र आफ्नो देशको फिल्म उद्योग जोड्ने उद्देश्य यो फन्ड प्रदान गर्ने चिसो वर्ष निर्माण समूहका सदस्यले सेतोपाटीलाई जानकारी दिए। विदेशका फिल्म ताइवानमा छायांकन गर्ने र विदेशी फिल्मको क्रु मेम्बरका रुपमा ताइवानी फिल्मकर्मीलाई संलग्न गराउने जस्ता कुरालाई ध्यानमा राखेर यो पुरस्कार वितरण गरिन्छ।
'चिसो वर्ष' नेपाल, टर्की, नर्वे, ताइवान र हङकङको सह-निर्माणमा बन्न लागेको फिल्म हो। 'कालो पोथी' फिल्मबाट चर्चा कमाएका मीनको चिसो वर्षको पटकथाले यसअघि विभिन्न अन्तर्राष्ट्रिय अनुदान तथा पुरस्कार पाइसकेको छ।
फिल्मले हालसम्म राइटिङ रेसिडेन्सी प्रोडक्सन, मार्केट स्क्रिप्ट ल्याब, प्रोजेक्ट लगायत महत्वपूर्ण अनुदान तथा पुरस्कार पाइसकेको छ। जसमध्ये नर्वेजियन साउथ फिल्म फन्ड (सरफन्ड) बाट ६० हजार अमेरिकी डलरको अनुदान सहायता मुख्य हो।
प्रि-पोडक्सनको तयारी भइरहेको चिसो वर्षको पटकथा २१ पटक पुनर्लेखन भइसकेको छ।
चिसो वर्षमा हिमाली गाउँको कथा छ। बहुपति प्रथाको पृष्ठभूमिमा यसमा पेमा र लामाको यात्रा समेटिएको छ। यी दुई पात्र हराएका आफन्तको खोजीमा निस्कन्छन्। यात्रा क्रममा पेमा र लामाको जीवनमा भौतिक तथा आध्यात्मिक अभ्यास र विश्वास एकअर्कासँग क्रसओभर भएर जान्छ।
माथिल्लो डोल्पा, हुम्लाको लिमी र रारा क्षेत्रमा छायांकन हुने यस फिल्ममा झन्डै पचास प्रतिशत नेपाली र विदेशी क्रु मेम्बर संलग्न हुने निर्माण पक्षले जनाएको छ। आगामी डिसेम्बरबाट फिल्मको अडिसन सुरु हुने बताइएको छ।
यो पनि पढ्नुस्ः जो 'चिसो वर्ष' को पीडा र आनन्दमा रमाउँदै छन्
