'कबड्डी ४ : द फाइनल म्याच' को सार्वजनिक मिति घोषणा भएको छ। सोमबार फिल्मको टिजर र रिलिज डेट सार्वजनिक गरिएको हो।
फिल्म २०७९ साल बैसाख २३ मा रिलिज हुने टिजरमा जानकारी दिइएको छ। रामबाबु गुरुङको निर्देशनको 'कबड्डी ४' मा दयाहाङ राई, सौगात मल्ल, बुद्धि तामाङ, विजय बराल, कमलमणि नेपाल, पुष्कर गुरुङ, कविता आले, जयनन्द लामा, प्रकाश घिमिरे, माओत्से गुरुङ, शरद अधिकारीलगायत कलाकार मुख्य भूमिकामा छन्।
कबड्डी 'अभागी' काजी, सोल्टिनी र बमकाजीको प्रेममा आउने अन्तर्द्वन्द्वको रोचक कथा हो। दर्शकले यसअघिका तीन वटै सिक्वल रुचाएका छन्। शैलेन्द्र डी कार्कीको छायांकन, निमेष श्रेष्ठको सम्पादन, कालीप्रसाद बाँस्कोटा, एसडी योगी, अनुपम शर्माको संगीत, रामबाबु गुरुङ र उपेन्द्र सुब्बाको लेखन छ।
दयाहाङ राई र मिरुना मगरको प्रेममा सौगात मल्लको प्रवेशले कबड्डी ४ लाई रोचक बनाउने अनुमान गर्न सकिन्छ।
सफल शृंखला 'कबड्डी' को यो नै अन्तिम भाग हुने निर्देशक गुरुङले बताएका छन्।
