पछिल्लो समयको लकडाउनमा गएको गायक हेमन्त शर्माको दैनिकी फुर्सदिलो बन्यो। त्यही फुर्सदको समयमा उनले आफ्नो डायरीका पुराना पानाहरू पल्टाए। अनि एउटा पृष्ठमा गएर उनको आँखा रोकियो। त्यसमा उनले केही समय अघि लेखेका ‘भन मेरो मालिक’बोलको गीत थियो।
झन्डै ४ वर्ष अघिबाट आफ्ना सिर्जना आफ्नै युट्युबमा सार्वजनिक गर्दै आएका शर्माले गीत सार्वजनिक नगरेको केही समय भएको थियो। युट्युबलाई चलायमान बनाउन पनि गीत रेकर्ड गर्नु पर्छ भनेर सोचिरहेका बेला आँखामा परेको गीत रेकर्ड गर्ने निधो गरे। गीतमा संगीत भरे र रेकर्ड गराए।
पछिल्लो केही गीतमा गायिका एलिना चौहानसँग सहकार्य गरेका शर्माले यो गीतमा पनि उनीसँगै सहकार्य गरे। गीतमा संगीत संयोजन श्यामस्वेत रसाईलीले गरे। गीत तयार भयो। उक्त गीतको म्युजिक भिडियो गायक शर्माले गत बिहीबार सार्वजनिक गरेका छन्।
गीतको म्युजिक भिडिओमा लोसिना लामिछाने र नरेशबीर सिंहले अभिनय गरेका छन्। दीपकमान सिंहले निर्देशन गरेको भिडिओका दृष्य अजय रेग्मीले खिचेका हुन्। भिडियो सम्पादन भने मिलन विश्वकर्माले गरेका छन्।
