कर्णाली साहित्य समाजले स्थापना गरेका सम्मान तथा पुरस्कार चैत दोस्रो साता प्रदान गर्न लागिएको छ।
कर्णाली साहित्य समाज साधना सम्मान–२०७७, कर्णाली साहित्य समाज कृति पुरस्कार–२०७७ र कर्णाली साहित्य समाज प्रतिभा पुरस्कार–२०७७ विभिन्न कृति, सर्जक तथा कलाकारलाई प्रदान गर्न लागिएको हो।
कर्णाली साहित्य समाजका संस्थापक संरक्षक महेशविक्रम शाहका अनुसार कर्णाली साहित्य समाज साधना सम्मान–२०७७ यस वर्ष प्राध्यापक डा. राजाराम सुवेदीलाई प्रदान गर्न लागिएको छ।
सर्जक सुवेदीका प्रदेशको मध्यकालीन ईतिहास (२०५४), बाइसी राज्यको ऐतिहासिक रूपरेखा (२०५६), कर्णाली प्रदेशमा मध्यकालीन डोटी राज्य (२०५६), अछामको ईतिहास (२०५८) जस्ता ऐतिहासिक महत्वका कृतिहरु प्रकाशित छन्।
कर्णाली साहित्य समाज साधना सम्मान ताम्रपत्रसहितको हुनेछ।
कर्णाली प्रदेश साहित्य समाज कृति पुरस्कार–२०७७ कथासंग्रह ‘जियरा’लाई प्रदान गर्न लागिएको छ। लेखक नयनराज पाण्डेद्वारा लिखित उक्त कथासंग्रहलाई प्रदान गर्न लागिएको पुरस्कार राशी ५० हजार रुपैयाँ रहेको छ।
यस्तै कर्णाली साहित्य समाज प्रतिभा पुरस्कार–२०७७ नृत्य निर्देशक कुलमान नेपालीलाई प्रदान गर्न लागिएको छ। कर्णाली प्रदेशका लोकनृत्यहरुलाई देशभर चिनाउन योग्दान गरेका सुर्खेतका नृत्य निर्देशक नेपालीलाई २५ हजार राशी रहेको उक्त पुरस्कार प्रदान गर्न लागिएको हो ।
कर्णाली साहित्य समाले २०७७ मा स्थापना गरेका यी सम्मान तथा पुरस्कारमध्ये गत वर्ष कर्णाली साहित्य समाज साधना सम्मान शताब्दी पुरुष सत्यमोहन जोसी र कवि श्यामललाई प्रदान गरिएको थियो ।
यस्तै गत वर्ष प्रतिभा पुरस्कार साहित्यकार बुद्धिसागर र कलासाधक प्रेमदेव गिरीलाई प्रदान गरिएको थियो भने कृति पुरस्कार कथासंग्रह ‘मरिचिका’ र ‘मोहपथ’लाई प्रदान गरिएको थियो।
कर्णाली साहित्य समाजका अध्यक्ष खगेन्द्र अधिकारी अमृतले समाजले स्थापना गरेका पुरस्कार तथा सम्मान वितरण गर्दा विशेषगरी साहित्यको माध्यमबाट कर्णालीलाई योग्दान गरेका सर्जक छनोट गर्ने प्रयास गरिएको बताए।
