कोभिड-१९ महामारी आउनुअघि पोखराकी एन्जिला राउतले चित्र कोरेकी थिइनन्। तर उनलाई चित्र कार्न जानेको भए हुन्थ्यो भन्ने लागिरहन्थ्यो। जब महामारी रोक्न लकडाउन भयो, उनले फुर्सद पाइन्। लकडाउनको फुर्सदमा उनले चित्र कोर्न थालिन्।
लकडाउनमा पहिलो पटक चित्र बनाएर उनले बहिनीलाई देखाइन्। परिवारका अन्य सदस्यले पनि राम्रो चित्र कोरेको भन्दै हौसला दिएपछि उनले दिनरात कुची र रंगसँग खेल्न थालिन्।
प्रकृतिमा फुलेका फूलहरू चित्रमा उतार्नु उनको ध्येय थियो। फूलमा बसेका रंगीविरंगी पुतलीमा पनि उनको नजर पर्यो। उनले विभिन्न रंग र प्रकारका फूल र पुतलीका चित्र बनाउन थालिन्। चित्रकला थालेको साढे दुई वर्षमै उनले चित्रकला प्रदर्शनी गरिन्।
फेवाताल किनार गौरीघाटमा मंगलबार आयोजित एकल चित्रकला प्रदर्शनीमा राखिएका चित्र देखेर दर्शक दंग परे। चित्रकला थालेको छोटो समयमै प्रकृतिका फूलहरू क्यानभासमा उतार्न सकेको सहभागीले प्रतिक्रिया दिए।
प्रदर्शनीमा एन्जिलाले ३५० वटा चित्र राखेकी थिइन्। उनले प्रति चित्र २ हजार ५ सयदेखि ८ हजार रुपैयाँसम्म मूल्य राखेकी छन्। केही चित्र प्रदर्शनीस्थलबाटै बिक्री भएको छ।
पहिलो प्रदर्शनीबाट हौसिएकी एन्जिला अब चित्रकलामै लाग्ने बताउँछिन्।
‘प्रकृतिलाई कागजमा सार्न पाए हुन्थ्यो जस्तो लागिरहन्थ्यो,’ उनले भनिन्, ‘अब प्रकृतिलाई चित्रमा उतार्छु।’
प्राकृतिक रूपमा फुलेका फूलहरू नै चित्रकलामा आफ्नो रोजाइ भएको उनले बताइन्।
चित्रकलामा धेरै गल्तीहरू हुने भन्दै उनले गल्तीबाटै चित्र बनाउन सिकेको बताइन्। यसअघि उनले चित्रकलासम्बन्धी कुनै औपचारिक शिक्षा भने लिएकी छैनन्।
चित्रकलामा लाग्नुअघि उनले पोखराका विभिन्न होटलमा रिसेप्सनको काम गरेकी थिइन्। उनले विभिन्न समयमा पोखराको पाँचतारे होटल पोखरा ग्राण्ड, टेम्पल ट्रि र वाटर फ्रण्टमा रिसेप्सन र र दा यात्रा होटलमा गेष्ट रिलेसन अफिसर थिइन्।
प्रकृतिमा फुलेका रंगीविरंगी फूललाई कागजमा उतार्दा छुट्टै आनन्द अनुभूति हुने एन्जिलाले बताइन्।
‘मलाई प्रकृतिका फूलहरू उतार्दा छुट्टै आनन्द लाग्छ, अब यसैमा लाग्छु,’ उनले भनिन्, ‘चित्रकला अनुभूत गर्दा पनि सुन्दर लाग्छ।’
एन्जिलाको कला मोह पहिल्यैदेखि भएको उनका आमा गुड्डी राउतले बताइन्।
‘जंगलतिरका जडिबुटी र अनेक फूल लिएर आउँथिन्,’ उनले भनिन्, ‘सानैदेखि यस्तै बानी थियो।’
