अभिनेता राजेश हमालले काठमाडौं सहरको अस्तव्यस्त अवस्था देखेर मेयर बन्नुपर्ला भनेर व्यंग्य गरेको बताएका छन्।
केही दिनअघि सार्वजनिक भएको उनको युट्युब च्यानलमा ‘काठमाडौंको मेयर बन्नुपर्ला’ भनेको विषय चर्चाको विषय बनेको थियो।
हमालले गाएको गीत ‘गाउँले ठिटो’को सार्वजनिक कार्यक्रमा बोल्दै शुक्रबार अभिनेता हमालले आफू साँच्चै मेयरमा उठ्ने सोच नभएको पनि बताए।
उनले कार्यक्रममा देश धेरै परिवर्तन भएको तर ती सबै व्यक्तिगत रूपमा मात्र भएको बताए।
उनले भने, ‘व्यक्तिगत रूपमा विभिन्न घरहरू, कफी सपहरू, होटेलहरू बनाउनुभएको छ। तर, जुन सरकारी काम हुनुपर्ने हो त्यो छैन। ढलको, पेटीको, ट्राफिकको, तारहरू त्यो अस्तव्यस्त देखिन्छ।’
उनले हरेक नराम्रो सहरमा पनि एउटा राम्रो ठाउँ हुने तर काठमाडौंमा त्यो ठाउँ नेदेखेको सुनाए।
हमालले कसैले घुम्नको लागि मल वा होटलमा नगए कुनै सार्वजनिक ठाउँ नभएको बताए।
‘यदि सार्वजनिक ठाउँ राम्रो भयो भने त्यस सहरमा बस्ने नागरिक पनि खुसी हुन सक्छन्,’ हमालले भने।
