मिलन चाम्सको निर्देशनमा नेपाली महिला फुटबलकी पहिलो नम्बरकी गोलरक्षक एन्जिला तुम्बापोको जीवनीमा फिल्म बन्ने भएको छl
प्रेमकुमार श्रेष्ठले निर्माण गर्ने फिल्म ‘एन्जिला’ लाई यस थापाले लेखेका छन् l
केन्द्र मोसन पिक्चर्सको प्रस्तुतिमा मुन लभ इन्टरटेमेन्टले सहकार्य रहेको फिल्ममा एन्जिलासँगै दयाहाङ राई, सृजना सुब्बा, बुद्धी तामाङ, माउत्से गुरुङ, प्रेमकुमार श्रेष्ठलगायतको अभिनय रहनेछ।
फिल्मको सह निर्मातामा केन्द्र लिम्बु, विनोद अग्रवाल र राजेश अग्रवाल छन्।
इलामको फिक्कल र काठमाडौंमा छयांकन हुने फिल्म आगामी दसैं आसपासमा प्रदर्शन गर्ने निर्माण टिमको योजना छl
फिल्ममा एन्जिलाले फुटबलर बन्नका लागि गरेको संघर्ष र सफलताको कथा समेट्ने निर्देशक चाम्सले बताए । ‘एन्जिलाको बालापनदेखि खेल जीवनसम्मको कथालाई फिल्ममा देखाउने छौं । फिल्मले खेलाडी बन्न प्रेरित गर्नेछ’ निर्देशक चाम्सले भने ।
कार्यक्रममा युवा तथा खेलकुद मन्त्री महेश्वर गहतराजले फिल्म र खेलकुद देशको पहिचानसँग जोडिएकाले यी दुवै क्षेत्र एकसाथ अगाडि बढ्नु पर्ने भन्दै एन्जिलाको जीवनीमा बन्न लागेको फिल्म खेल क्षेत्रमा आफ्नो भविष्य बनाउन चाहने धेरैका लागि प्रेरणा बन्ने धारणा राखे ।
एन्जिला पहिलो पटक अभिनयमा देखिन लागेकी हुन् । अहिले मण्डल थिएटरमा अभिनय सिकिरहेकी उनी आमाका लागि फिल्ममा अभिनय गर्न लागेकी हुन् । आफ्नो जीवनीमा फिल्म बन्नु आफ्नो लागि ठूलो उपलब्धि भएको एन्जिलाले बताइन्।
२०५३ मा पाँचथर जिल्लाको फाक्तेपमा जन्मिएकी एन्जिलाले १३ वर्षको उमेरदेखि नै फुटबल खेल्न सुरु गरेकी थिइन् । सन् २०१४ मा श्रीलंकामा सम्पन्न एएफसी यु–१४ गल्स रिजनल ट्रफीबाट अन्तर्राष्ट्रिय प्रतियोगितामा डेब्यू गरेकी उनी २०१४ बाट राष्ट्रिय टिममा परेकी थिइन् । तर, उनी २ वर्ष बेञ्चमै सीमित भइन् । त्यसयता भने उनी महिला राष्ट्रिय फुटबल टिमको भरपर्दो गोलरक्षक बनेकी छन्।
