न्यूरोडको रञ्जना सिनेमा हल आजबाट सञ्चालनमा आउने भएको छ।
बन्द भएको लामो समयपछि पुनः रञ्जना सिनेप्लेक्सको नाममा हल सञ्चालनमा आएको हो। रञ्जना सिनेप्लेक्सको तीन अडिटोरियममा ५३१ सिट क्षमता छ।
सञ्चालक नरेन्द्र महर्जनका अनुसार पुनः सञ्चालनमा आएको सिनेप्लेक्समा १३०, १८० र २५१ सिट क्षमताका छुट्टाछुट्टै तीन वटा अत्याधुनिक सेवा सुविधा सहितको हल सञ्चालनमा आएका हुन्।
सञ्चालक नरेन्द्र महर्जनका अनुसार प्रोजेक्सनलाई स्तरिय बनाउन फोरके प्रोजेक्सन राखिएको छ। यस्तै नेपालमै पहिलो पटक एलडब्ल्यु साउण्ड सिष्टम जडान गरिएको छ। थ्रिडि फिल्मका पारखीहरुलाई लक्षित गरि हलमा थ्रिडि सिस्टम पनि हलमा जडान गरिएको छ।
विस २०१४ सालबाट सञ्चालनमा आएको रञ्जना नेपालकै पुरानो चलचित्र हलमध्येको एक हो। कुनै समय चलचित्र प्रदर्शनका लागि प्रमुख मानिने रञ्जना सिनेमा बन्द गर्दै सञ्चालकले सो स्थानमा रञ्जना ट्रेण्ड सेन्टर निर्माण गरेका थिए।
मल निर्माण गर्न भन्दै २०६५ साल भदौमा न्युरोडस्थित रञ्जना हल बन्द गरिएको थियो।
२०७१ साल साउन २५ गतेबाट रञ्जना ट्रेण्ड सेन्टर सञ्चालनमा आएको थियो। कालु गुरुङ, वीरेन्द्रनारायण महर्जन र नरेन्द्र महर्जनको टिमले संचालन गरेको हलमा बिहीबार साँझ विशेष शो आयोजना गरिएको थियो।
