‘राष्ट्रिय लोक दोहोरी महोत्सव-२०७८’ शनिबारदेखि काठमाडौं टुँडिखेलमा सुरू भएको छ। महोत्सवको उपराष्ट्रपति नन्दबहादुर पुन ‘पासाङ’ले उद्घाटन गरे।
उद्घाटन गर्दै उपराष्ट्रपति पुनले लोकगीतमा हाम्रो इतिहास, हाँसो, आँशु, पीडा, परिस्थिति कलात्मक तरिकाले प्रस्तुती हुने भएकाले लोकगीत जीवनको वास्तविक अभिव्यक्ति भएको बताए।
कुनैबेला गाउँका मेलापात, वन जंगल, रोधी, विवाह लगायतमा गुञ्जने लोक दोहोरी आज सहर हुँदै अन्तर्राष्ट्रियकरण भइरहेको उपराष्ट्रपति पुनले बताए।
‘कुनैबेला समुदाय विशेषका मेला, पाखा, वनजंगल, रोधी, चौतारी, विवाह लगायत विभिन्न उत्सवहरूमा दोहोरी गीत गाउने गरिन्थ्यो। लोक दोहोरी आज गाउँबाट सहर पसेको छ। सहर मात्र होइन विश्वका विभिन्न मुलुकमा पुगेको छ। र, लोक दोहोरी संगीतले व्यवसायिक रुप पनि लिइरहेको छ,’ पुनले भने ‘यसबाट भन्न सक्छौं हाम्रो चिनारी, हाम्रो गौरवको रुपमा रहेको लोक दोहोरी गीत अन्तर्राष्ट्रियकरण भैरहेको छ।’
दोहोरी गीत सुन्दा जस्तो आनन्द, रोमाञ्चकता र उत्सुकता अरु गीतमा नहुने उनको भनाइ छ। उनले महोत्सवमा हुने प्रतियोगीताले नेपाली लोक दोहोरीलाई नयाँ उचाईमा पुर्याउने प्रतिभाहरूको जन्म दिने विश्वासका साथ महोत्सव सफलताको शुभकामना समेत दिए।
चैत ३० गतेसम्म अर्थात पाँच दिन चल्ने महोत्सवलाई डिएआर मुभिज एण्ड फिल्मस् इण्डष्ट्रिजले आयोजना गरेको हो।
महोत्सवको पहिलो दिन चर्चित गायक-गायिकाहरूले प्रस्तुत गरेका थिए। पूर्वेली गीतदेखि सुदुरपश्चिमको देउडा भाकासम्म एउटै मञ्चबाट गुञ्जिएको थियो।
उपराष्ट्रपति पुनकै आग्रहमा बाग्लुङ, म्याग्दी जिल्लामा गाइने लोपोन्मुख यानीमाया भाकासँगै रोल्पा जिल्लातिर गाइने मौलिक लोकभाका ‘साइँला बरै’ समेत टुँडिखेलमा प्रस्तुत गरिएको थियो।
विरन्द्रकुमार झाले मैथली गीत प्रस्तुत गरे भने कमलीकान्त भेटवालले पूर्वेली गीत प्रस्तुत गरे। त्यस्तै, मणिराम करिया मगरियाले थारु गीत प्रस्तुत गरे भने सरोज लामीछाने र रामकुमार नेपालीले काठे लोकभाका गीत पस्किए।
कार्यक्रममा नन्दकृष्ण जोशी र पुष्पा बोहोराले देउडा भाका प्रस्तुत गरे भने टिका बमजनले तामाङ सेलो गीत गाए। महोत्सवको पहिलो दिन लोक गीतमार्फत योगदान पुर्याउने थुप्रै अग्रज कलाकारहरूलाई सम्मान समेत गरिएको थियो।
अग्रज देउडा गायक नन्दकृष्ण जोशी, भोजपुरी गायक धु्रवसिंह ठकुरी, थारु गायक मणिराम करिया मगरिया, अग्रज गायिका तिर्थ कुमारी थापा, मैथली गायक विरेन्द्रकुमार झा, राष्ट्रिय लोक तथा दोहोरीगीत प्रतिष्ठानका संस्थापक अध्यक्ष अम्मरविरही गुरुङलाई सम्मान गरिएको थियो।
स्वर्गीय बुद्धिकृष्ण लामिछाने, रत्न बानियाँ, जंगबहादुर गन्धर्व, भगवती दंगाललाई मरणोपरान्त सम्मान प्रदान गरियो। उद्घाटनसँगै शनिबारबाटै दोहोरी प्रतिस्पर्धा सुरू भएको छ।
देशभरका विभिन्न जिल्लाबाट सहभागी ६७ समूहबीच प्रतिस्पर्धा हुने आयोजकले जनाएको छ। प्रतियोगीतामा प्रथम हुने समूहलाई ५ लाख रुपैयाँसहित पदक तथा अन्य पुरस्कार प्रदान गरिनेछ। त्यस्तै, द्वितीय, तृतिय र सान्त्वना हुने समूहलाई क्रमशः तीन लाख, दुई लाख र एक लाख रुपैयाँसहित अन्य पुरस्कार प्रदान गरिनेछ ।
दोहोरी प्रतियोगीताको निर्णायकमा पुरुषोत्तम न्यौपाने, घमेश दुलाल, हरी थापा, सीता थापा, रीता थापा, कमलीकान्त भेटवाल र शिव हमाल निर्णायकका रुपमा छन्।
गायक–गायिकाहरू अमृत खाती, मिना मैया थापा, भिमसेन खतिवडा, सरोज लामिछाने, रविन लामिछाने, कल्पना दाहाल र राम कुमार नेपाली सम्मिलित निर्णायक मण्डल समेत रहेको छ।
महोत्सवमा उत्कृष्ट गायक-गायिकालाई २५ हजार नगद पुरस्कार एवं २० हजार राशीको नव-प्रतिभा पुरस्कार समेत प्रदान गरिनेछ। महोत्सवमा हरेक दिन विभिन्न विधाका चर्चित कलाकारहरूको समेत प्रस्तुती रहनेछ।
